كتب : محمد اكسجين
فى البداية يقول محمد 26 سنة

1- إحنا ضـد الإخوان ، والفلول ، والعسكر
2- المائدة دي مش تابعة لأي حركة أو إئتلاف أو حِزب سياسي "إحنا مجموعة شباب قررنا نعمل المائدة للشهُداء عشان نِعلي مراتبهم في الجنة لحِد أما نجيب حقهُم في الأرض.
3- طبعاً متزعلش لما حد يقولك شيل أو إعمل وإنت متعرفهوش "إحنا كلنا بنشتغل" كلنا واحد,
4- طبعاً الناس إللي هتيجي تسـاعدنا وأول مرة يحضروا معانا  ، أحب أفكركم إننا مش بنفطر حَد ، إحنا بعد ما الناس بتفطر بنلم الكراسي والترابيزات ونشيلها وبعد كدة نبتدي إحنا ندور هنفطر إزاي "نجمع فلوس من بعض ونفطر ، بنت من البنات تكون عاملة لينا أكل ، كل واحد يروح يفطر لحالة ، أو نفطر في السحور
ع العموم أهلاً وسهلاً بيك وسط شِلة المائدة.
ثم يقول محمد يُومي بقي عُباره عن الأتي:-

أصحي من النوم الساعة 1 ونص أتصل بـ عَاصم ويلا وسُلطان ويلا بينا يابني إنت وهو نتقابل عشان نروح محمد محمود نظبط الدُنيا.

نوصل محمد محمود نقعد نريح شوية من حَر المِترو وبعد كدة يلا بينا ننقل الكراسي والترابيزات من الجراج لـ الشارع ويجي كام واحد ويلا بينا نشيل وننزل من الساعة 4 لحد الساعة 5 ونظبط الكراسي والترابيزات من 5 لـ 5 ونص.

عاصم وسُلطان ماسكين المطبخ جوة في الشارع بيغسلوا الكوبيات والشفاشق ويجهزوا المية والتمر عقبال ما نبعت نجيب تلج.

البنات تيجي تخُش علي عاصم وسُلطان يساعدوهم في تحضير المية الساقعة والتمر الهندي.

وأول ما عاصم يقولي يا كالوشا التلج أبعت "حسين حلمي بالموتسيكل يجيبلنا التلج عشان نحطة في المية والتمر.

ويجي ما قبل أذان المغرب بـ نُص ساعة البنات تنزل علي الترابيزات شفاشق المية الساقعة وكوبيات التمر هنِدي والشباب قبلهُم بيفشروا الجرايد علي الترابيزات.

هُوووب أبدء أشوف ع الترابيزات إية إللي ناقص الناس "محدش قدامة مية ، حد مش قدامة كوباية تمر " عشان أبعت الشباب يقولوا لعاصم إبعت شفشق تمر وشفاشق المية الناقصة.

مرحلة توزيع الوجبات قبل أذان المغرب بـ 5 دقائق "نبدء ننزل للناس إللي ع المائدة من الأخر للأول عشان محدش يطلع بوجبته برة الشارع.
عشان يُقعد ياكل معانا في المائدة ميطلعش بيها برة.

بعد ما الوجبات تخلص ويكون كل الناس إللي ع المائدة بتفطر تبدء الشباب تِمشي بشفاشق المية والتمر في الشارع برة الشارع تفطر التاكسيات والناس اللي ماشية في الشارع والناس إللي ماشية عشان يكسروا صيامهُم.

نستني الناس تخلص أكلها ونبدء نلم الكراسي والترابيزات ونغسل الشفاشق والكوبيات.
الكراسي والترابيزات تتحول شيل علي الجراج ، والشفاشق والكوبيات تتغسل وتتحول ع الجراج.

ونبدء نغسل إيدينا ونتشطف من خرطوم المية  ،، وبعد كدة نقفل الحنفية ونشيل الخرطوم

وهوووب يالا كل الناس تمشي من الشارع وينتشروا.

أقوم أنا مروح البيت أرتااااح عشان نفس الموضوع دة هيحصل بُكرة