جيل التمانينات والتسعينات

جيلنا ((جيل التمانينات والتسعينات)) كان فيه اللي بيرسم حلو بس مدرس العربي ضربه عشان كان بيرسم في كشكول الواجب
وكان فيه اللي شاطر في الحساب وبيحل المسألة قبل ما المدرس يشرح فبياكل قلم على وشه عشان المدرس فاكره بياخد درس برة.
وفيه اللي كان بياخد صفر في التعبير عشان كتب رأيه بكل صراحة من غير مقدمة ((قبل أن اكتب في هذا الموضوع الشيق الجميل))
وفيه اللي كان بيتعملله استدعاء ولي امر عشان فتح الكمبيوتر بتاع المدرسة اللي اصلا مدرس الكمبيوتر مبيعرفش لا يفتحه ولا يقفله.
وفيه اللي كان بياكل بالخرزانه على دماغه عشان كانت كل حياته انه يلعب كورة وكان احرف من الاساتذة
وفيه اللي كان بيلم زبالة من الحوش عشان شافوه في فصل الموسيقى بيعزف على الأورج.
رغم كل التحديات دي .. ورغم كل حاجة في المدرسة من مدرسين قرع بخرزانة جلد ومدرسات عواجيز عايزين يكملو الحصة من غير صوت عشان يعرفو يتكلمو مع زمايلهم المدرسات اللي مش عليهم حصة، ومن مدير مدرسة قاعد في مكتبه مبيظهرش الا عند تحية العلم، ومن اخصائي اجتماعي بييجي المدرسة يمضي وبعدين ينزل يشتغل ع التاكسي بتاعه، ومن مدرسين ألعاب ارفع واحد فيهم في جسم صلاح جاهين،
رغم كل دة، ورغم كل حاجة تقتل اي موهبة وتدفن اي طموح وتحولك من اذكى طفل في العالم لبني ادم براس قرد
إلا إننا لسة بنقاوم .. وجيلنا رغم ان مالوش حظ بس لما ظهر الفيسبوك خلى مواهب كتير تظهر .. اللي بيعرف يرسم واللي شاطر في الحساب واللي بيعرف يعبر واللي بيعرف يبرمج واللي عنده موهبة رياضية وهكذا.
جايز الناس دي مش بالشهرة اللي كانو بيتمنوها. بس اكيد لو كان فيه اهتمام من زمان كان زمان الجيل دة هو اللي خلى مصر لامؤاخذة ام الدنيا ولامؤاخذة قد الدنيا
بس من الواضح ان جيل الخمسينات والستينات مش هيسيبها غير لما يخربها !