السلطة المصرية تغلق بيت الرصيف الثقافى عشان خاطر عيون سفير كوبا

قاعد فى بلدنا و بيقدم فينا شكوى!


بيت الرصيف هينقل مكان تاني !


بيت الرصيف فتح يوم 20 فبراير 2013، وساعتها معايير إختيارنا للمكان كانت مُنحصرة في إنه يبقى مكان قُريّب من المترو علشان يبقى سهل الوصول ليه ..


شهر أبريل 2013 عملنا حوالي 11 حفلة في المكان، وده خلى جيران كتير زعلت مننا؛ فوقفنا الحفلات من شهر مايو لحد شهر يولية وفي الفترة دي كتبنا جواب بنشرح فيه للجيران إحنا بنعمل إيه في بيت الرصيف ولفينا على كُل البيوت والعُمارات اللي حوالينا ووزعنا عليهم ورد وجوابات وإتفقنا معاهم إن الحفلات هتبقى يوم الخميس والجُمعة بس .. ومن ساعتها لحد شهر 11 كانت العلاقات حلوة مع كُل الجيران وماجالناش شكاوي تاني ..


شهر 11 اللي فات إتفاجئنا بحملة من المُحافظة جايه علشان تقفل المكان بُناءً على بلاغ مُقدم من واحد من جيرانا (سفير كوبا) .. ساعتها إتكلمنا مع السفير قال إنه مش مستحمل صوت الحفلات حتى أيام الخميس والُجمعة، ساعتها قررنا إننا نوقف الحفلات اللي بتتعمل في الساحة الخارجية لبيت الرصيف وإتفقنا معاه على كده وبعتنالُه إعتذار وسيبناله رقم تليفون علشان لو عنده أي شكوي يتصل على الرقم ده،


الشهر ده حملة من المُحافظة جات بيت الرصيف شالت عداد الكهربا بتاعنا، ولما سألناهم نعمل إيه علشان نرجعُه قالولنا نرجع للحي، روحنا مقر حي المعادي، وقالولنا إن المُشكلة أكبر من الحي والمُحافظة وإن سفير كوبا، قدم فينا بلاغ جديد للخارجية، وكل ما بنتكلم مع السفير يقولنا روحوا حلّوا مشاكلكم مع حكومتكم ..


فريق عمل بيت الرصيف قرر إن خُسارة نهدر طاقتنا في الرد على السفير خصوصاً إننا كُنا بنجرب تنفيذ فكرة بيت الرصيف وقُدرتها على الإستمرار، وبمجرد إثبات نجاح الفكرة هيبقى لازم ننقلها لمساحة أكبر ومُناسبة لتطويرها ..


دلوقتي إحنا بنشوف حتة أرض في المعادي تكون مُناسبة ومُستقلة علشان نبني عليها بيت الرصيف .. من هنا لحد ما نلاقي الأرض دي هنتابعكم بكُل الأخبار،


بيت الرصيف قافل دلوقتي .. وفي مساحة صُغيرة مفتوحة علشان الورش اللي شغالة دلوقتي تكمل .