- بصراحه أنا ليّا مدير
أستاذ خصم وتكدير
ودى حاجات ناجح أوى فيها
وجايب فيها كمان تقدير
أنا مديرى كيفه يوماتى
ينغص عليّا حياتى
ويخترعلى ف أى حاجه
يزود بيها مهماتى
ف أمرى بحسه بيفكر ومحتار
ف إيه يطحنى طول النهار
بحس ساعات إنه ناقص يقولى
إنزل بعد الشغل إشتريلى الخضار
ف نظره دايماً انا ف شغلى مقصر
وياسلام لومره جيتله متأخر
يفرج عليّا كل اللى ف الشغل
ويبتدى لسانه ينقط ف سكر
فاكر الإداره إنه بس يعلق
ويعلى صوته ويأمر ويتخلق
فاكر إنه بكده يبقى مدير
وإنه لقواعد الإداره بيطبق
ماافتكرش عملها مره بصراحه
إنى غلط ف حاجه وفهمنى براحه
كل مره يدينى الطريحه التمام
ويقولى فاصل ونكمل بعد الإستراحه
أنا ليّا مدير متأكد لو شافنى
بضّرب ف الشارع أو حد خاطفنى
هيعمل نفسه مش شايف وهيكمل
ف طريقه عادى ولا كأنه يعرفنى.
رامى زين
1 تعليقات
رائعة جدا اخى ^_^ يعطيك العافية
ردحذفحريّة النقد والرد متاحة لجميع الزوار بشرط يكون خال من الكلمات البذيئة. تذكّر قول الله عز وجل (مَا يَلْفِظُ مِن قَوْلٍ إِلاَّ لَدَيْهِ رَقِيبٌ عَتِيد