والد الطفلة المتفحمة فى المركز الطبى بسبب الإهمال الوزارة تتنصل من المسئولية وتقول ان المركز مغلق قبل الحادث بأيام

والد الطفلة المتفحمة فى المركز الطبى بسبب الإهمال  الوزارة تتنصل من المسئولية وتقول ان المركز مغلق قبل الحادث بأيام

أكسجين : أستاذ عمرو عبد المحسن الناس اتألمت لما شافت فيدو وصور الحادث اللى احترقت فيه بنتك فى الحضانة عايزيين نعرف ايه اللى حصل ؟؟

كنت فى شغلى والمدام اتصلت بيا قالت ان فى عندها آلام ولادة وكدة فاتصلت بالدكتور بتاعها قال اديها دوا معين وانتظر ساعة كمان وبعد ربع ساعة المدام اتصلت وقالت ان الولادة تمت فى البيت بالفعل فرحت لأقرب مركز هو مركز الروضة طبى مركز لأمراض النسا والولادة وحضانات وكدة وطلبت ان دكتور او دكتورة من هناك يجى معايا البيت علشان فى ولادة تمت فى البيت وعايظزين حد يتابعها واظهرت لهم بطاقتى وارسلوا معى طبيبة اسمها فاطمة كانت خارجة من حجرة عمليات تقريبا فجت معايا وقالت المدام محتاجة غرزتين بس والمولودة محتاجة اكسجين سألتها يعنى حالتها طبيعية ولا نعرضها على طبيب اطفال قالت لا طبيعية وكويسة احنا هنديها اكسجين بس مجرد اجراء بسيط فرحنا المركز والدكتورة دى طلبت تجهيز حجرة العمليات للأم وطلبت من العاملة تاخد الطفلة علشان تدخل حضانة ما بعد الولادة والعاملة اخدت الطفلة وانا مش 

متخيل ان العاملة هى اللى هتتعامل بشكل مباشر مع الطفلة دخلنا حجرة العمليت لزوجتى وتم تخديرها وعمل عملية تنظيف لها وخياطة وكدة وبعد شوية لقيت العاملة جاية تقول للدكتور انا نظفت المولودة وجهزتها وحطيتها على الأكسجين وكله تمام انا اتصدمت ان العاملة هى اللى بتقول الكلام دة وانها هى اللى عملت الكلام دة ولقيت الدكتورة بتقولها روحى خليكى جنبها فراحت العاملة وبعد لحظات سمعت بتصرخ .فرحنا لقيناها حطت الطفلة على جهاز تدفئة لحديثى الولادة مش جهاز اكسجين وتنفس وفوجئت بالجهاز مولع والنار فى كل حتة وبنتى ملقاة على الأرض بهدومها والنار قايدة فيها وهى جثة هامدة ومتفحمة .وانا معرفش هى وقعت على الأرض ازاى وايه اللى حصل احنا مسمعناش صوت حريق ولا انفجار طبعا انا شفت المنظر وبنتى محروقة كان كل اللى جه فى تفكيرى هى الأم فاتصلت بالإسعاف قالوا لى فى حادثة ومفيش عربيات اسعاف رغم انى قلت لهم على الواقعة بس محدش اهتم رحت اخدت زوجتى اللى تحت تأثير البنج لسة ومتخدرة 

اخدتها فى تاكسى ورحت للدكتور بتاعها عملها العملية واطمنت عليها ورحت المركز تانى علشان اشوف بنتى والحادث دة وطلبت اتكلم مع الدكتورة فاطمة فوجئت انهم بيقولوا دى مش دكتورة وان مفيش دكاترة فى المركز فى الوقت دة ودى مش دكتورة دى ممرضة اسمها رضا يعنى الممرضة هى الى اتعاملت مع الزوجة هى اللى كشفت عليها واعطيتها البنج الكلى وهى اللى كانت هتعمل لها العملية وعاملة هى اللى تعاملت مع بنتى ومع جهاز هى لا تفقه شئ فيه بدات مساومات تحصل معايا فأنا رفضت الكلام ورحت عملت محضر فى قسم الهرم واتقبض على الممرضة رضا دى اللى انتحلت صفة طبيبة والعاملة هند والمباحث عاينت والنيابة شافت شغلها والبحث الجنائى عمل شغله على اكمل وجه ومازالت التحقيقات فى النيابة


أكسجين : ايه الصعوبات اللى واجهتك بعد كدة ؟؟


المشكلة انى مش عارف اطلع شهادة وفاة لأن مفيش شهادة ميلاد طلعت ومحدش عارف الإخطار هيبقى ولادة فى البيت ولا اخطار يجى من الطبيب ولا المركز ومن المنتظر ان يكون حل الموقف من النيابة علشان اطلع شهادة ميلاد وشهادة وفاة
المشكلة ان مفيش حد عايز يتحمل المسئولية وردود الفعل المستفزة من الجهات المسئولة وزارة الصحة بتقول انا قفلت المركز قبل الحادث بأربع ايام قفلت المركز ازاى وهم لسة شغالين وسايب لهم الأجهزة واليافطة متعلقة والمكان مفتوح وشغال وبيتعامل مع المواطنين تانى من غير رقابة ومن غير اى حساب ورغم انه اتقفل تانى واتشمع بالشمع الأحمر نلاقى 

صاحب المركز حاطط ورقة على الشمع ومخبيه وكاتب مغلق للتجديدات وكأنه بيعيد الكرة تانى وممكن يفتح ويتعامل مع الناس بعيد عن اعين الوزارة فين الرقابة على المراكز اللى شغالة بدون تصريح فين الرقابة على المراكز اللى معاها تصريح وتعمل بشكل بعيد عن المواصفات والمعايير السليمة فين الرقابة على المستشفيات والمراكز دى ليه كل مسئول خايف على الكرسى يتهرب من المسئولية ويقول قفلناه وخلاص ويرجع يشتغل ليه مفيش حد بيتحاسب بجد وهو المسئول علشان يحافظ عى الكرسى بتاعه يضيع حقى وحقوق الناس ويعرض حياتهم للخطر انا بقول لأى مسئول ربنا كبير وهو اللى هيجيب لى حقى ان شاء الله