السيسى بواب العمارة الجديد

كتب : شهر زاد الثورة

البواب بتاعنا اتفق مع جماعة بلدياته .وجابهم سكنهم فوق سطوح العمارة وسيطروا على السطوح ومنعوا حد يطلع من السكان ولا نحط دش على السطوح ولا حاجة غير الدوشة بتاعتهم وبعد شوية مكنهم من الدور الأرضى كمان وشغال معاهم بزنس ومصالح طالعة نازلة ..داخلة خارجة .والبعيد مستفيد قوم سكان العمارة عملوا دوشة جامدة وراسهم والف سيف لازم تمشى الجماعة دول .قالهم فوضونى بالتصرف وراح جاب بلطجية من الشوارع الخلفية وفعلا قام عليهم هاتك يا ضرب وخرجهم


....شوية وراح مأجر السطوح ملهى ليلى والشقة اللى فوقنا بيت دعارة وجاب فتوة اسمه سيد العيفش يحرسهم ويلاغيهم ....وقام الواد سيد العيفش ساق فيها قوى وعمال يتحكم فى السكان اللى طالع واللى نازل واللى بيتكلم ......وبيقطع علينا النور بالساعات والولاد بيذاكروا .......ويقولنا ولا تشغلوا تكييف ولا غسالة وخلو اللمبة الموفرة شغالة واللى زاد وغطى انه عمل فى بدرون العمارة سجون واللى يفتح بوؤه يتخطف وينزل البدرون ورجالته شغالة ضرب وتعذيب فى السكان


 وبيفرض عليهم اتاوة بيسميها كفالة عشان يخرج العيال الغلابة والغريب ان فى بعض من سكان العمارة بيساندوه وموافقين على اللى بيعملوا .....احنا غلبنا نقول البواب يحرس العمارة بس مش يتحكم فيها هو والبلطجية بتوعه.........عايزة رأيكم نعمل ايه فى الواد الفتوة سيد العفيش والبيه البواب اللى ماسكين الشوم والسلاح