قصيدة " اضرب ياباشا " للشاعر محمد خفاجي

اضرب ياباشا فرَّح قلوب
كمل طريقك إياك تتوب
دا غلطنا برضه إزاى نواجه
رصاص سعادتك بكسرطوب

غازك وحشنا راجعين ندوق
مفعوله أقوى من النشوق
منتش حارمنا ياأصيل ياذوق
ولاحوشته عنا لاجل الحروب

ضدك بنهتف وبالساعات
وانت اللى واقف فى سكات
عندك حياء ولا فى البنات
واحنا الديابه قساة قلوب

عمال بتدى ف تضحيات
جدران بتقفل فى الحارات
تضرب بتاخد ترقيات
يبقى عليك إزاى ذنوب

مسك الختام إنت تمام
واحنا اللى شعب ولاد حرام
طبق بقى الإعدام وعام
على كل ثورى كشف عيوب

قصيدة " اضرب ياباشا " للشاعر محمد خفاجي