من أجل علبة الكشرى التقرير دة عن جودت الملط

Hala Mostafa ELzaghandi‏
بعد تفكير و مباحثات أخدت قرار مصيرى
هشتغل حرامى
ما تتخضوش!! مش هعمل غبى منه فيه و اسرق معلقة كشرى...انا هلهف العلبة كلها
لأنى هبقى رئيس جمهورية
و كأى حرامى محترف .... تحت ايده عصابة محترمة .. لازم الاقى حد يقفّل ورايا
بس ازاى؟؟؟؟؟؟؟؟؟؟؟؟؟؟؟
دانا لسة بقول يا هادى و هَمِد ايدى .. لقيت ديوان محاسبة بينخور ف كل صغيرة و كبيرة من اول ديوان الرئاسة لحد اصغر هيئة ف أحقر قرية و اللى زاد وغطى انه بتاع الشعب ..و تبع مجلس الشعب .. الله يحرق ثورة 19 اللى كانت السبب
و عشان يقفلوها ف وشى لقيتهم عاملين كمان محكمة محاسبات يعنى القاضى و النيابة بتوع ارقام و مش هتخيل عليهم حركاتى..الله يخرب بيت ثورة 52 اللى كانت السبب
لكن على مين..دانا رئييييس الجمهورية..و عليه قررنا الآتى:
الغاء محكمة المحسابات نهاااائيا
(تم سنة 1985)
ديوان المحاسبة اللى بقى الجهاز المركزى للمحاسبات ..ده بقى صعب الغيه
بلاش!! اللى ماتعرفش تلغيه..أيّفه
خصوصا ان الدستور مافيهوش حاجة تحمى صلاحياته او تحدد اختصاصاته
يبقى اللعب ف القوانين يبتدى بقى...اهو كده الشغل يحلو
(تم تعديل قوانين الجهاز بمشروع قانون 144 سنة 1988 حتى استقر على القانون الحالى سنة 1998)
إمم..أممم...لأ مش مبسوط لسة..مش مرتاح لسة..انا لسة هسرق ف علب؟..انا عايز ابيع الكشرى بالعلب باللى بياكلوه..عايز اخصخص اللى مش متخصخص و اريح بالى و انام متهنى و جيمى و امه يرضوا عنى
الموضوع كبير يا ريس ..عايزله رجالة من بتوع المهام الصعبة
تاهت و لقيناها...هاتولى عاطف..حلو عاطف ..يا عاطييييف
طب و اللى هيقفّل ورايا؟!!!؟
عايز راجل لابس كرافته و شكله متربّى و ابن ناس..العملية ف النملية و مش طالبة مشبوهين و ياريت يكون سنه من سنى كده عشان نعرف نتفاهم.
جودت الملط !!!
رئيس مجلس الدولة يا ريس و كان رئيس محكمة الأحزاب و ياما خدمنا و سبق و رفض حزب الوسط و غيره
حلو يعنى؟
ماشى........عيّنوه!!
(تم تعيين كلا من عاطف عبيد و جودت الملط فى اكتوبر سنة 1999...يا محاسن الصدف)
بص بقى يا ملط!! احنا داخلين على منعطف تاااااريخى و مهمتك الاساسية مساعدة عاطف ف الخصخصة...مش هوصيك بقى ف كام تمثيلية على كام مسرحية تقطعوا فيها بعض....قوانينك ف جهازك تعرف خلاصك..
و خد عندك القوانين اللى طبخنهالك اهى :
اولا: الجهاز ده يتسحب من مجلس الشعب..يبقى تبعى انا..رئيس العصابة..قصدى رئيس الجمهورية ..
ازاى يا ريس ؟ الجهاز بيراقب المال العام اللى بتنهبة العصابة بتاعت سيادتك (السلطة التنفيذية) ازاى يبقى تبعك؟
مين ابن الغتيتة اللى سأل السؤال ده؟
علّقوه!!
انت معايا يا ملط؟ تمام!!
ثانيا: تعيينك بإيدى ..و ماحدش بايده يشيلك غيرى ..هجددلك كل اربع سنين !! عايزك بقى تشهيصنى و تظبطنى و تغسلى وشى ادام الناس و تحمّـينى و تلبّـسنى و تحكيلى حكاية قبل النوم...قشطة!!
ثالثا: كفاية العيال اللى شغالة عندك مش عايز قرف!! مش عايز تعيينات و شباب يقرفونا !! انت اللى هتعمل كل حاجة لازمتهم ايه؟ و بالنسبة للى عندك .. اديهم على دماغهم..اسحب صلاحياتهم..قلل مرتباتهم..خليهم ملخومين ف لقمة عيشهم..هم مش احسن من بقيت الشعب
..و ف ايدك قانون زى الفل بيمنع اى حيوان فيهم يحاول يقدم تقرير للنيابة من غير ما يعدى عليك الاول..و ماحدش منهم هيستجرى يشتكيك الا برده ليك.....و لو حد عصلج هنهدده و نبهدله و انت تكمل عليه..مش هوصيك بقى جزاءات و نقل و اللذى منه ..ماحنا شلنا عنهم الحصانة ..يعنى ملطشة ف ايدينا..و كله بالقانون..مرضى يا عم؟
!!
(لم يتم التعيين ف الجهاز خلال 12 سنة الا دفعة واحدة 450 عضو استقال منهم 123 عضو لتدنى الاجور)
مرضى فخامتك!! و لجل عيونك فخامتك ظبّطت كام قرار يمنعوا الجهاز من مراقبة الرئاسة و ديوان الرئاسة و اللى جابو أم الرئاسة.. هقولهم دى امور سيادية و أمن قومى..قشطة فخامتك!؟
شكلك فاهم يا ملط !! يا ريت و حياة ابوك كمان رئاسة مجلس الوزرا لجل عيون حبيبك عاطيييف..و كمان الرقابة الادارية
و عشان بدأت تفهمنى و حبيتك ..شيل كمان الرقابة من على الجهاز نفسه..ها مرضى يا عم؟!!
آه! كمان ماتنساش المدام بقى!! يعنى ممكن رقابة شكليه كده..من برة بس..على مجلس الامومة و الطفولة و مكتبة اسكندرية و المجلس القومى للمرأة!
بعد اذن فخامتك..نحط معاهم المجلس القومى للشباب..اصل عقبال امالتك جوز بنتى يبقى رئيسه..فخامتك عارف بقى..البنت حبيبة ابوها...قشطة!!؟
قشطة ع الجميييييع... حد فهم حاجة؟ حد لسة مش مصدّق؟
الاثباتات عندى و التصريحات و الحوارات و الأدلة و التقارير..أكثرها ممنوع يتقدم بيها اعضاء الجهاز..أظن كلنا عرفنا السبب .. قانون الجهاز المتين و اللى يرفع تقرير للنيابة يلبس جناية..وش كده
طب عارفين البيان الختامى اللى قاله الملط ف مجلس الشعب سنة 2009..عارفين قال ايه عن الرئيس؟
ده الكلام بالنص:
ان السيد رئيس الجمهورية يتابع مع الوزراء و المحافظين و كافة المسئولين بالدولة, ما يتعلق بحياة الناس و توفير الحياة الكريمة لابناء مصر و التركيز على مشاكل المواطنين,فالشغل الشاغل للرئيس هو حياة المواطن البسيط و الرئيس يصرح و يوجه و يتابع مع المسئولين بالدولة, كل ما يتعلق بحياة البسطاء و الفقراء و محدودى الدخل و ما يستحقونه من حياة كريمة و يطالب بتحقيق العدالة فى توزيع عوائد التنمية.
و ده مش تصريح صحفى ولا اهداء للرئيس يوم عيد ميلاده..ده بيان رسمى مسجّل و يُتخذ على اساسه قرارات .بيان من مسئول رقابى عن رأيه المهنى فى رئيس السلطة التنفيذية..و البيان امام ممثلى الشعب .رأيى أنه لازم يتحقق معاه على زيف البيان لما اكتشفناه بعد التنحى و بالمستندات
بعض القضايا باختصار :
1- قضية حديد عز:
اولا للى مش عارف, حديد عز شركة بتاعة عز, و حديد الدخيلة شركة بتاعة الدولة, يعنى بتاعتنا, بلعبة حقيرة قدر عز يكون مساهم كبير فيها و بقى ياخد منها الحديد الخام و يصنعه عنده و يبيعه باعلى من الاسعار العالمية, زى الانجليز لما كانوا بياخدوا القطن و يبيعولنا الملابس غالية
الاستجواب فى مجلس الشعب كان عن الفرق الشاسع بين سعر الخام اللى احمد عز بيشتريه من الدخيلة و بين سعر الحديد اللى بيبيعه لينا ف الآخر.
و بعد فحص اعضاء الجهاز للموضوع كتبوا تقرير وصوا فيه بالآتى: نوصى باستبعاد احمد عز من رئاسة شركة حديد الدخيلة
جودت الملط حط التقرير ف الدرج و كتب واحد تانى بيوصى فيه بالآتى:
نوصى بوضع قوانين لمنع الاحتكار
( يااااا حلاوة..ايه علاقة ده بده ?..ما علينا)
2- قضية القمح الفاسد:
فجرت المصرى اليوم قضية القمح الفاسد سنة 2008 بعد ما واحد شريف ف الجمارك بعتلهم اوراق تثبت ان القمح دخل البلد على انه علف حيوانى ...فقدم 12 عضو استجوابات فى مجلس الشعب , و بناء عليه كلف الملط لجنة للبحث ف الموضوع و كان قراره ف النهاية: القمح غير فاسد او مشع او مسرطن و انما فيه خلل فى مادة الجيلاتين التى تساعد على تماسك الدقيق...و كان ناقص يوصى ستات البيوت باضافة مقدار و نص نشا لكل أردب قمح عشان الفطيرة تبقى مية مية.
بعد الثورة المشكلة اتفجرت تانى..الملط لم يكذب خبر..جرى على النائب العام و ارسل تقرير يتهم فيه رشيد باستيراد اقماح فاسدة ..و عشان ما حدش يركبه الغلط..كتب تاريخ المخالفة من 2008 الى 2010..عشان طبعا ما يطلعش نفسه كداب ف التقرير الأولانى و يبقى عداه العيب و أزح.
3- فى قضية البنوك:
الموضوع فيه قروض و ائتمان و ارقام مش فاهماها اوى..من البنك الاهلى و مصر..بس التقرير اللى كتبه اعضاء الجهاز فيه كلام يودّى ف ستين داهية و الاجراء القانونى للكلام بتاعهم هو تحويل فاسدين كتير و منهم (حسين سالم) للنيابة بتهمة اخد قروض بدون ضمانات و سرقة مليارات من المال العام..اما التقرير اللى سلّمه الملط كان يوصى فيه بعمل اوعية ادخارية..
و ارجوكو بلاش احراج و ماحدش يسألنى ايه الأوعية دى
بس اللى حرق دمى و انا بقرا الكلام ان حسين سالم واخد قرض عشان يصنع انابيب يوصل فيها الغاز لاخوانا البعدا..مااااااا علينا..
4- كوميديا عقد مدينتى:
الحكاية بدأت من عند أعضاء الجهاز...اللى فحصوا العقد كعمل دورى بيقوموا بيه و كالعادة طلعوا فيه مخالفات (ستاشر مخالفة) و كالعادة برده ..جودت الملط حطه ف الدرج... الخبر وصل لمهندس عادى من برة الجهاز(حمدى الفخرانى) و مسك ف مخالفة واحدة و رفع قضية و حصل على حكم ببطلان العقد و سحب الأرض و بيعها بالمزاد..بعد كده عرفنا ان الموضوع اتحل و مجموعة طلعت مصطفى دفعت الفرق و الدنيا بعد ما قامت قعدت تانى..فين الكوميديا ؟؟؟؟
الكوميديا جاية أهى:
العقد النهائى اللى جودت الملط وافق عليه و قال مية مية مافيهوش اى اهدار للمال العام...المفاجأة ان العقد الجديد هو هو صورة طبق الاصل من العقد القديم
عارفين لما تجيبوا ورقة بمية جنيه و تفكوها عشرات...اهو هم عملوا كده بالضبط و بالتحديد زكريا عزمى
سعر المتر ما ارتفعش..كل اللى حصل ان طلعت مصطفى كان هيدفع تمن الارض قيمة عينيه..قام بدّل و كتب انه هيدفع بدالها فلوس..و مش كاش كمان..انما على 30 سنة..يعنى الاول كان احسن على فكرة
(و بالمناسبة حمدى الفخرانى رافع قضية تانى على العقد الجديد)
انتو تعبتوا ؟ انا تعبت !!
عندى لسة كتييييييييير ف مواضيع مشهورة زى توشكى و مواضيع ماحدش يعرف عنها اى حاجة
عن شركات وهمية بتصرف ملاااااااين ف السنة بدون اى عائد
عندى بلاغات مقدمها موظفين للنائب العام
و عندى قرارات جزا و نقل لموظفين حاولوا يخرجوا التقارير الحقيقية للناس
المعلومات و الاوراق من مجموعة رقابيون ضد الفساد ..و الاوراق معايا و الله على ما اقوله شهيد
السؤال اللى بيطرح نفسه دلوقتى
كام عقد مخالف مرمى ف الدرج و ماصادفوش واحد زى الفخرانى ؟
كام شحنة أكل فاسد و مسرطن و مشع دخلت البلد و بناكل فيها و ماصادفتش حد ف الجمارك يكشفها ؟
كام واحد واخد بلايين الجنيهات قروض و ماحدش كشفه؟
كام شركة وهمية بتاخد مرتبات و يتحطوا ف جيب حد مانعرفوش؟
كام جنيه لسة بيتنهب ف اللحظة اللى بكتب فيها دى و ماحدش قادر يتكلم؟
كام فاسد بيبرطع ف البلد و احنا ما نعرفش حتى اسماءهم ؟
كام واحد مكانه الطبيعى ف طرة و عايش بره؟
و كام تقرير ف الدرج ممكن يودّى سكان طرة لحبل المشنقة بدل ما ياخدوا اخلاء سبيل؟
مش عارفة كام بالظبط..بس اللى متاكدة منه ..ان كل ده عند واحد بس
جودت الملط
هتقولوا يا ستى!! انتى لسة فاكرة!! زمانه حرق و فرم و ستف و ظبّط زى زكريا عزمى و شفيق من قبله
لأ!! اطمنوا!! التقارير دى مش ف أوضة قافل عليها و رامى المفتاح..التقارير دى متنطورة ف كل الادارات ..ف كل المحافظات ..موجودة تحت ايادى ناس شرفا و نضيفة..القانون مكتفها و جودت الملط واقفلهم ف الزور
الناس دى قعدت مع المجلس العسكرى و طلبت اقالة الملط و قدموا كل الاثباتات اللى ما يقدروش يتقدموا بيها رسمى للنائب العام و طلبوا لجنة فحص لكل السنين اللى فاتت و طلبوا تغيير قوانين الجهاز عشان ما يفضلش خيال مآتة بعد الثورة كمان.
عارفين قالهم ايه؟
العقد بتاع الراجل هينتهى شهر عشرة و الراجل ماشى ماشى على ايه البهدلة
طبعا مش خافى عليكو سبب التباطؤ...على ما يكون اللى ف طرة خدوا اخلاء سبيل و لا براءة
مستنيين لما يفلسعوا و يطلعولنا لسانهم و يقولولنا امكوا ف العش و لا طارت
..و مش بعيد يكونوا بيحضّروا للى هييجى بعد الملط و يستلم الدفة
و برده مش خافى عليكو المجلس بييجى بايه!!
ايواااااااا ..بالضغط
يوم 12 /6/2011 ..الحد الجاى .. فى وقفة ادام الجهاز المركزى للمحاسبات..صلاح سالم ادام عمارات العبور.. الساعة 12
هو عامل مؤتمر كبيييير جوه الجهاز يطبّل لنفسه شوية..يعنى فى اعلام ..عايزين نستغل الفرصة و نكشفه
الراجل ده كان مترشح يبقى رئيس وزرا بعد التنحى..فاكرين؟
الراجل ده بيفكر يبقى رئيس جمهورية !!!
الراجل ده لازم يمشى و قوانين الجهاز تتغير
بتهيألى دى اهم خطوة بعد ما قبَضنا ع الحرامى
لازم نمشّى اللى كان بيقفّله
عشان ترجعلنا كل علب الكشرى...
و لا انتو رأيكو ايه؟