بص يا سيدي
هتنزل المطار هتلاقي امين شرطه مقابلك والضحكه من الودن للودن وبيقولك نورت مصر بس لازم تمد ايدك في جيبك تديله الشاي
هتطلع بره هتلاقي تاكسيات معفنه تشوفك خليجي او اجنبي هياخدوا منك الاجره ×10 اصل انت مغفل ولازم تتقلب حد يجي مصر ياعم
خدلك ساعتين بالميت عشان توصل الفندق اللي انت قاعد فيه لو فندق في وسط البلد واستمتع بالزحمه والاشارات وريحة العادم الجميل
ربنا يكرمك وهتوصل الفندق هتلاقي الهوس كيبنج عمالين يرددوا نورت مصر وبنفس ابتسامة امين الشرطه وبالتالي انت هتديهم زي ما اديت امين الشرطه هما اقل منه يعني ؟ متبقاش بخيل
الدنيا ليلت انزل استمتع بمصر وجمال مصر اتمشي متركبش مواصلات هتلاقي كل اتنين متر شحات الهي يكرمك يا بيه وربنا يطول في قفطانك هات اي حاجه يا بيه مانت معاك فلوس #زي_الرز
هتطلع ع الكورنيش وتستمتع بمنظر الزباله وريحه الحيوانات الميته هتقابلك بنت بس مش حلوه تديك ورده بس مش ببلاش يا عبيط هتقولك ب20 جنيه لو مش اغلي ومش بالابتسامه لا بالغلاسه
قررت تنزل خان الخليلي بقي يا روقانك ياعم مفيش تمثال هديه زي صلاح عبدالله ما ادي للي في الفيديو لا هتلاقي شوية تماثيل جبس ومشغولات صفيح وهيتنصب عليك في تمنهم يا معلم عشان انت عبيط متعرفش انها متساويش 1 علي 10 من التمن اللي هتشتريها بيه
هتروح تقعد ع القهوه هتلاقي القهوجي جاي بحته خرقه معفنه ممسوح بيها حمامات يمسحلك الترابيزه والكرسي اللي كانوا انضف قبل المسح وعلي وشه نفس الابتسامه اياها فاكرها ؟
هتطلب كوباية شاي ب 25 جنيه دا اللي هيقولهولك طبعا كوبايه شاي بتمن نص كيلو شاي لبتون ناعم عارفه ؟
مش هتلاقي ممثلين في الشارع عشان بيبقوا في عربياتهم وقافلين الازاز عشان محدش يعرفهم والناس تتلم عليهم ويتبهدلوا وهما بيتصوروا سيلفي مع المعجبين
مصر مش اللي في الاوبريت يابا الحاج وربنا بيشتغلوك
خد بعضك ياعم واطلع علي ماليزيا تركيا فرنسا سويسرا اي حته نضيفه ومش هتغرم نص اللي هتتقلبه في مصر
ولو ولابد من مصر عندك شرم الشيخ اضرب المايوه البفته وبلبط يومين وارجع بلدك قول مصر قطعه من الجنه
مصر بعيده خالص مش قريبه زي ما بيقولوا
قالك #مصر_قريبه
اه #ملحوظه : متشيلش شنطه ولا تتكلم فى الموبيل فى الشارع عشان العيال اللي راكبين موتوسيكلات هيخطفوها ويجروا
وبلاش تشيل فلوس معاك او موبايلات غاليه عشان البلطجيه هيثبتوك في الشارع وياخدوهم منك
------------------------------------------------
إرسال تعليق
حريّة النقد والرد متاحة لجميع الزوار بشرط يكون خال من الكلمات البذيئة. تذكّر قول الله عز وجل (مَا يَلْفِظُ مِن قَوْلٍ إِلاَّ لَدَيْهِ رَقِيبٌ عَتِيد