Mahmoud Elhetta
اتصال هاتفي فى المستقبل بين مواطن مصري وموظف شركة المياة 
الزمن : السنة الرابعة فى حكم السيسي عام 2018 
تيرررررررررررررن تيررررررررررررررررن 
الموظف : مساء الخير يا فندم رشيد ترشيد من شركة المياة فى خدمة حضرتك اتشرف بإسم حضرتك ؟ 
المواطن : معاك مفقوع يا استاذ , والله حضرتك انا دافع اشتراك المية والنهاردة 15 فى الشهر والمية قطعت والوضع صعب جدا عندي .
الموظف : اااااه شكل حضرتك اسرفت فى الإستخدام يا فندم ممكن اعرف باقة حضرتك ايه ؟ 
المواطن : انا مشترك فى باقة سيسي ميديم وانا راجعت استخدامي كويس والمفروض ان متبقي ليا 30 ليتر حضرتك . 
الموظف : انا مثبت عندي استخدام حضرتك الباقة بتتيح ليك 100 ليتر فى الشهر بمعدل غسلتين وش يوميا وعدد واحد استحمام فى الاسبوع دة غير نص ليتر شرب فى اليوم و2 ليتر للطبخ ومتاح ليك مرتين تستخدم فيهم الحمام مرة تقيله ومرتين خفيفة . 
المواطن : لا بقى مش مظبوط الكلام دة انا شخصيا مستحمتش بقالي شهر عشان اوفر فى الباقة للمدام والولاد ولما بتزنق فى الخفيف بعملها فى بير السلم . 
الموظف : لا حضرتك كنت بتغسل وشك 3 مرات كل يوم ومثبت عندي كمان ان المدام استحميت 4 مرات فى الاسبوعين اللي فاتوا و ولاد حضرتك 4 مرات هما كمان حموم فى الاسبوعين . 
المواطن : وانت مال اهلك المدام و الولاد يستحموا مرة ولا اتنين ولا عشرة وغير كدة بقولك انا بقالي شهر مستحمتش عشان اوفر . 
الموظف : يا استاذ مفقوع استهدى بالله صدقني انا هريح حضرتك .
المواطن : لا حول ولا قوة الا بالله اتفضل يا استاذ رشيد . 
الموظف : حضرتك ممكن تضيف باقة 50 ليتر ب 200ج + 50 ج تبرع لصندوق تحيا مصر اعتقد يكفوا لغاية اخر الشهر وحضرتك رشد استخدامك بقى وخصوصا فى الإستحمام والبيبي والشرب والطبخ و التنضيف . 
المواطن : اااااااااااااااه يا أخي حرام عليك حرام عليك جدد الزفت الباقة لما نشوف اخرتها فى ايامكم السودة دي . 
الموظف : سلامتك يا استاذ مفقوع الف سلامة بمجرد حضرتك متشحن كارت الإضافة للباقة هيوصلك الخمسين ليتر , هل عند حضرتك اى استفسار تاني ؟؟