معتز مطر يكتب : انا اللي جيت (لضباط الشرطة )

معتز مطر فى مقدمة نارية لضباط الشرطة :

انا اللي جيت لك في 2005 وقولتلك عايز اطلع بطاقة انتخابية .. وقولتلي امشي يالا من هنا .. ومشيت 

انا اللي جيت لك في 2006 وقولتلك موبايلي اتسرق وانا عارف مين اللي سرقه .. وقولتلي طب متروح تضربه و تخده منه طالما انت دكر كده و عارفه

انا اللي في 2008 وانا برخص العربية قولتلي اوعى تدفع رشوة لحد ابدا .. لكن لو عايز تقدر تعب الامين ده اديله 50 جنيه عشان يفحص وهو مبسوط .. واديته

انا اللي في 2009 ابنك كان تعبان وجبتهولي المستشفى وبعد مابقي كويس قولتلي ده جميل عمري ما هنساه .. ده عمل زين .. وهيفضل في رقبتي ليوم الدين

انا اللي في 25 يناير 2011 وانت بتجري ورايا اتكعبلت و وقعت .. ورجعتلك قولتلك انا دكتور و ممكن اساعدك قولتلي .. انا كويس روح يا دكتور انت شكلك ابن ناس ومحترم .. قولتلك كل اللي في الميدان ولاد ناس ومحترمين ..كلهم مخلصين وطنيين .. بس انتوا اللى مش فاهمين .. مش فاكرني ؟؟

انا اللي في 28 يناير بعد ماضربت فيا ساعات وساعات .. غاز وخرطوش قدام مسجد الاستقامة.. بعد .. ما الحواجز الامنية اتكسرت واتفكت .. ابتسمتلك وسلمت عليك وقولتلك انت ملكش ذنب انت عبد المأمور ..انت مش عدوي .. انت كمان مقهور زي .. انا وانت غلابة .. صدقني انا بعمل كده عشان ولادك قبل ولادي .. علشان يعيشوا ايامهم اللى جايه عادى ..

انا اللي كنت في الميدان ورفضت حد يضربك وقولتلهم ده انسان زيكم زيه .. اوعى تغركم قوتكم دلوقتي .. انسوا غيوه ..

انا اللي قاعدت شهور اقولك ارجع لشغلك .. مصر محتجالك .. وراعي ربنا في مالك وعيالك .. واتعامل باحترام وطبق القانون .. مش عايزين بلادنا علينا تانى تهون

وكان ردك : أنا معنوياتي بقت في الارض .. انا عندي احباط .. و كأن معنوياتك ارفع من معنوياتنا و كأن كرامتك أغلى من كرامتنا ..... يا حضرات السادة الظباط ..... ألف سلامة من الاحباط

انا اللي حاولت افهمك ان الثورة دي ليك قبل ما تكون ليا .. الثورة دي هي اللي هتخليك فعلا حامي لوطن كامل لشعب بحالة مش لفرد واحد ... وهي اللي بسببها زاد مرتبك .. بس يظهر ماعجبكش الكلام

انا اخوك .. وصاحبك .. وابن عمك .. وجوز اختك .. وصاحب اخوك .. و ابن صاحب ابوك .. وزميل خطيبتك .. ودكتور ابن اختك .. انا العريس اللي اتقدم لبنت خالتك .. انا اللي قومت في المترو وقعدت والدتك ..
ليه مصمم تموت كل حاجة حلوة بتجمعنا .. ليه بتوصلها لحكاية ملهاش اى معنى؟
ليه قررت تقتلني .. ليه بغل تدبحنى .. ليه مش خايف عليا .. ليه عايز تخلينا اعداء .. ليه عايزني افرح في موتك ولما ينزل بيك البلاء ؟ واشمت في انكسارك ومش هصدقك تانى لما تقول انك كنت من لجهلاء ؟

.. انا عارف انك مش فاضي تفتكرتي ولا فاضي تقرا رسالتي .. بس حبيت اكتبها برضوا عشان ابقى عملت اللي عليا واحذرك تحذير اخير..
وقولك ان الامر بجد المرادى خطير..

وان مش هينفعك اللى عيش دلوقتى فى دور الامير..

مش عايزك تزعل لما ابقى زيك .. وتكون انت الاسير

لا ابراهيم ساعتها هيبقى نافع .. ولا السيسى هيبقى شافع .. كله يا حضرة الضابط هيبقى بيطير بيطير.. الله غالب

كمل يا معتز انا اللي شيلتك على كتافي يوم 30 /6 انا اللي وصلتك للي انت فيه دلوقتي انا الكوبري اللي انت عديت عليه