عندما قرر والدي الانتقال الى مدينة الاسكندرية .. تركنا خلفنا كل متعلقاتنا التقيلة منها و الثمينة قبل الخفيفة الرخيصة و مضينا لا نلوي على شيئ حيث ان منزلنا في الاسكندرية يحتوي على كافة الاشياء بلا استثناء (مش عاوزين كركبة يا سمية) دي كانت كلمة والدي ليا .. و وهب البيت بكل ما فيه لمن يستحقه (معلش محدش بيعمل كدة دلوقتي) انما كانت عندي مشكلة كبيرة قوي !!!! البــــــــــيــــــــانـــــــــو !!! ... البيانو بتاعي هعمل فيه اية ؟ صديق حياتي و رفيق عمري .. اكتر من 15 سنة اصحاب مفيش ايد لمسته غيري .. اصبح جزء لا يتجزء مني .. بابا قال لي نبيعه و نجيب واحد جديد في اسكندرية .. انا مش فاضي اتفق مع عربيات و عمال و ناس تيجي تشيل و تنقل و تظبط .. نبقى نجيب واحد من هناك ... بس يا بابا !! ... مفيش بس .. بعد نص ساعة لقيت خير اللهم اجعله خير واحد جاي يشيل البيانو .. مشتري يعني .. و انا جالي ساعتها هستريا بكاء و قعد يفتح و يقفل فيه و يحسس عليه زي ما يكون عبد اسود نزل سوق النخاسة ...و قعد يقولي .. لالالالالا دة ميسواش .. التاتش بتاعة مش حلو .. و كمان عندك بيدال مش شغال .. و كمان دة فرنساوي يعني الشاسيه خشب .. و لسة هيكمل وصله الاهانة للبيانو بتاعي الا و صرخت في وشه و قولتله مش هبيع حاجة بابا استغرب و قالي هتسيبيه يعني هنا ؟ قولتله لا انا هتبرع به لقصر الثقافة اللي جنبنا .. خلي ناس تانية تستفيد منه انما النخاس تاجر الاعضاء البشرية دة لا يمكن ابيع له البيانو على جثتي و فعلا اتصلت بصديق ليا في القصر قولت له تعال خد البيانو بتاعي .. مصدقش خااااااااااااااااااااالص اني ممكن افرط فيه لأي سبب و هو يعلم تماما مدى ارتباطي به و مدى ارتباط البيانو بيا (حقيقة مؤكدة) و فعلا نص ساعة و وصلت عربية و شالوا البيانو للقصر بعد معانااااااااااااااااه رهيبة مكانش عاوز يتشال و بقى تقيييييييييييييييييييييييييل موووووووووووت ولازق في الارض .. و انا تقريبا اغمى عليا و هو ماشي من كتر البكاء و مرضتش اروح معاهم .. حسيت انها جنازة لحبيب قلبي و صديق عمري .. و بعد نص ساعة لقيت زميلي بيتصل بيا و بيقولي بصوت مدبوح و مذهول .... سمية .. البيانو بتاعك انتحر ..... ؟؟؟؟؟؟؟؟ احنا شايلينه بالرافعة وصلنا به للدور التاني .. و الحبل انقطع بقدرة قادر زي ما يكون حد قطعة بسكينة من النص و البيانو نزل فتافيت زي الملح !!!! مش هكمل لكم بقية اللي حصل .. لكن انا طول عمري مؤمنة ان البيانو دة اخد من روحي و انا كمان اخدت من روحه و مكانش سهل ابدا اننا ننفصل ... ارقد في سلام يا (ابن سينا) دة كان اسمه
0 تعليقات
حريّة النقد والرد متاحة لجميع الزوار بشرط يكون خال من الكلمات البذيئة. تذكّر قول الله عز وجل (مَا يَلْفِظُ مِن قَوْلٍ إِلاَّ لَدَيْهِ رَقِيبٌ عَتِيد