كان فيه ناس بتقول ده شعب متدين لما كان بينتخبهم

كان فيه ناس بتقول ده شعب متدين لما كان بينتخبهم .. وناس تانية بتقول عليه جاهل .. لما اتقلبت الآية .. الأولانيين قالوا عليه عبيد .. والتانيين قالوا عليه القائد والمعلم .. 

والاتنين اتهمونا بالتكبر على الشعب لما خالفناهم وقت انتصارهم ..

الاتنين ما بيهمهمش الشعب غير لما بيرجح كفتهم .. غير كده ولا ليه عوزة .. 

واحنا بقى مش مهمومين (أو بنحاول على الأقل) غير بحقوق الشعب .. بمصلحته .. وهنفضل نوعيه بحقوقه وبالصح والغلط (على قد علمنا) .. حتى لو فضلنا ضد التيار طول عمرنا .. ومش معنا اننا ننزل على رغبة الشعب فى اللى يحكمنا .. اننا نرضى بظلم الحاكم .. ولا نبطل نقول رأينا ..

مش تفضل مننا ولا بنمن بده على حد .. بالعكس .. اللى يتعب مننا أشرف له يقف .. بدل ما يتعب وبعد كده يمن بتعبه على الناس .. ويطلب التمن .. مش عايزين نبقى زى ناس ..

لكن ده تمن ان ربنا رزقنا بفضل من العلم والرزق .. وكان نصينا من خير البلد ديه أكتر من ناس كتير .. وربنا يوم القيامة هيحاسبنا على كل ده .. وشعب مصر ليه حق علينا .. وهنوفيه على قد ما نقدر عشان يوم القيامة واحنا بنتحاسب ربنا يرحمنا برحمته ..