قصة حقيقة مضطرين نختار ما بين العقل والقلب

 


Hany Elgamal
أول ما اتخرجت واشتغلت كان مديرى فى الشغل راجل متدين وشاطر فنيا .. بس ما كانش بتاع بيزنس خالص .. ورغم انه مفروض مسؤول عن نتايج الشركة ونجاحها .. كان كل اللى يهمه ان عربية الشركة تيجى فى ميعادها وتروحه فى ميعاده .. وبعدين اتباعت الشركة بسبب نتايجها التعبانة .. وجالنا ممثل الشركة اللى اشترت عشان يظبط الشركة .. وكان باختصار راجل بتاع بيزنس .. مالهوش فى موضوع التدين ده خالص .. معتمد علينا فنيا .. بس كل اللى يعرفه فى التعامل معانا انه يضحك علينا بوعود كدابة ويقلل من مرتباتنا على قد ما يقدر ..

كانت شخصياتهم فعلا نقيضين بكل البساطة اللى بشرح بيها الموضوع .. الأول كنا بنحبه ونقدره على المستوى الشخصى .. بس أكيد صحاب الشركة كان طالع عينهم منه .. التانى كنا ما بنحترمهوش على المستوى الشخصى أكيد .. وما أظنش حتى انه نجح على مستوى البيزنس .. بس يمكن عشان ما عرفش يضحك علينا وسبناله الشركة .. يمكن فى ظروف تانية كان قدر ينجح الشركة ..

كنت بشوفهم فتنة لبعض بكل ما تحمله الكلمة من معنى .. واحد شايف التانى خمورجى وما بيصليش .. والتاى شايف الأول ما بيشتغلش وبيستحل مرتبه الكبير أول كل شهر .. للأسف كل واحد شايف فى التانى اللى يخليه ينام بليل راضى عن نفسه .. رغم ان الاتنين مقصرين ومذنبين .. وللأسف هو ده الموقف المنيل والزنقة المهببة اللى احنا واقعين فيها النهاردة ..

مش عارف ليه مضطرين نختار ما بين العقل والقلب؟ مش عارف ليه مضطرين نختار بين العلم والايمان؟ مع ان طائر النهضة ما ينفعش يطير من غير الجناحين مع بعض
محمد اكسجين