الاول : مهما يحصل الرجالة مابتجبش ورا
اوعى تفكر نفسك ف نزهه النظام بيرتعش ومضطرب ونفسه يخلص منك لانك صداع فى صميم عرشه..
أول حاجة حاول وانت نازل أى مظاهرة أو وقفة أو فاعلية أنك ميبقاش معاك فلوس كتير أو أوراق مهمة أو موبايل غالى أو حاجة تخاف عليها لإن ساعة القبض غالبا ما بيتاخد منك كل دا وغالبا برده مش هتعرف ترجعهم تانى
تعمل ايه لو اتقبض عليك ف مظاهرة او ف وقفة او م البيت او فى الشارع؟؟
طبيعى انه هايضربك ضرب مبرح كنوع م الانتقام منك حاول بشت الطرق انك تتفادى اى ضرب فى وشك او ف دماغك حاول تخلى وشك ودماغك حضنين ايديك اﻻتنين وخلى الضرب كله على جسمك معلش ماهى ضريبة الحرية .....
وهوده غالبا هايكون المرة اﻻولى واﻻخيرة اللى هتضرب فيها من ساعة القبض عليك فعلقة تفوت وﻻ حد يموت !!
بعد كدة هتركب عربية اﻻمن المركزى وهتطلع على حاجة م الاتنين يامعسكر امن او على قسم شرطة وياريت تكون مجهز رسالة على موبايلك انهتم القبض عليك وتبعتها بسرعة على رقم حد من زمايلك او احد اﻻرقام دى ضرورى جدا تكون الرسالة دى مسجلة على موبابلك فيها اسمك وتفاصيل الحركة او الحزب اللى بتنتمى ليه ورقم من الارقام دى
القاهرة
01002850271
الاسكندرية
01275215660
او اى رقم لزمايلك ضرورى جدا .. او حتى رقم أهلك
وضرورى تبئا سريع جدا وانت بتبعت الرسالة الجاهزة دى لانهم هايخدوا منك الموبايل على طووول ولو مالحقتش تبعت الرسالة خلى ف جيبك دايما ورقة جاهزة فيها الرسالة دى وحاول تحدفها لاى حد م العربية ضرورى جدا ...
بعد كدة هتروح على مكان احتجازك المؤقت وياريت تحفظ شكله صم وتحاول تبلغ اى حد بمكان احتجازك اى حد خارج نيابة او طالع من هناك تديله ورقة بالتفاصيل او تبلغه يبلغ حد معين بمكان احتجازك!
فى محضر هايرغموك ع التوقيع عليه ف الشارع او المعسكر او السجن ماتقلقش مالوش ﻻزمة ﻻنه بيكون تحت اكراه بدنى ونفسى ومش بيتاخد بيه بس ف اجاباتك لو اتسالت على طوول ماحصلش ماحصلش!!
لو عرضوك ع النيابة بسرعة من غير محاميين وانت ادام النيابة صمم على انك مش هتتكلم اﻻ ف حضور محاميين واحفظ رقم حد تعرفه واديه لوكيل النيابة قوله انا عاوز اتصل بحد يبعت محاميين ولو تم الضغط عليك هتجاوب الاجابات التالية...
اى سؤال ماحصلش ...
كنت بتعمل ايه ..؟؟
انا كنت ف بشترى هدوم ولوحدى وماكنش معايا حد ..؟؟
هل تنتمى الى اى حزب سياسى او حركة ؟؟
ﻻ انا ماليش ف السياسة وكنت نازل اشترى هدوم وقبضوا علية وضربونى وسحلونى وحطونى ف عرببة امن مركزى وضربونى تانى جواها....
ولو فيك اصابات خليك مصر ومصمم على تحويلك للكشف الطبى وقول ان الضباط هما اللى ضربوك مش عساكر !!
حاول تكتب ورقة تديها لاى حد عند النيابة وفيها نفس التفاصيل اللى قولناها قبل كدة وتزود عليها انك اتعرضت ع النيابة الساعة كذا يوم كذا ومن غير محامى !!
ده دورك والدور الباقى ع المحاميين ماتقلقش اوعا تحت اى ضغط تقول حاجة ده حقك واوعا تفرط فيه خالص !!
معلش لحد ما ربنا يسهل وننول الحرية ونحقق مطالب الثورة اتبع التعليمات دى واحفظها كويس جدااا...
وإن شاء الله ربنا يحفظنا كلنا ومنتحطش فى الموقف ده
0 تعليقات
حريّة النقد والرد متاحة لجميع الزوار بشرط يكون خال من الكلمات البذيئة. تذكّر قول الله عز وجل (مَا يَلْفِظُ مِن قَوْلٍ إِلاَّ لَدَيْهِ رَقِيبٌ عَتِيد