نحتاج اولويز لعقولنا }

منقول
 نحتاج اولويز لعقولنا } ............................. كنت فى 

صيدليه دكتور صاحب ى من شويه ودخلت زبونه المانيه 

واشترت شويه حاجات وكان من بينهم الفوط الصحيه " اولويز " 

مفيش ربع ساعه ودخلت زبونه تانيه واشترت شويه حاجات 

وبرضه كان من بينهم الفوطه الصحيه . مشيت من عند صاحبى 


وافتكرت من فتره كنت واقف فى صيدليه فى سوهاج ودخلت بنت 

ونادت على اللى ماسكه الصيدليه وكلمتها بصوت هامس وبكلمات 

قليله .. فهمت منها المسئوله عن الصيدليه المطلوب اخدت 

جورنال ولفت " الطلب " وحطته فى كيس اسود !! والطلب ده 

الاسم المستعار للاولويز .. وبيختلف الاسم من مكان لاخر المهم 

تمت العمليه فى سريه تامه وطبعا انا كنت عارف ايه اللى فى 

الكيس لما قارنت بين الموقفين لقيت ان فى فرق شاسع فى الثقافه 


بين شعبنا العظيم وبين الاوربيين الست الاوربيه دخلت واخدت 

الفوطه على انها شئ عادى وطبيعى وانها حاجه من ضمن 

الحاجات اللى اشترتها واللى بتحتاجها فى حياتها العاديه واستحاله 

تلاقى راجل اوربى بيعلق تعليق جنسى بعد ما هى تمشى ولا انه 

يتكلم فى حاجه زى دى اصلاً لكن عندنا الامر مختلف ! عندنا 

الفوطه دى لازم تباع فى سريه تامه ..بعيداً عن اعين الذكور 

المفترسه !! اصبح اى شئ له علاقه بالعضو الانثوى عيب وقلة 

ادب يعنى لو واحده مصريه دخلت صيدليه وكان فى اتنين شباب 

قاعدين وقالت بصوت واضح للصيدلى انها عايزه فوطه صحيه 

مش هاتشبع كلام جنسى وتريقه عقب خروجها من الصيدليه ! 

اصبح الجزء السفلى هو محور اهتمامات هذا الشعب العظيم نقلل 

من شان السيدات والفتيات دائماً .. حتى لما يكونوا محتاجين 

يشتروا فوطه صحيه لازم يشتروها فى سريه تامه ملفوفه فى 

جرايد وكيس اسود !! ليه يعنى ؟؟؟ ايه المثير فى ده ؟؟ ناهيك 
طبعا عن مهازل التحرش الجنسى اللى بقت تتم فى وضح النهار 

وبمنتهى السفاله وقله الادب امتهان كرامه المراه مازال يتم 

وبشكل اوسع وفى كل الاتجاهات متى تتحرر المراه من سيطره 

هذا المجتمع المريض ؟! موقف بسيط عابر ..لكن يعبر عن كثير 


من المعانى نحتاج اولويز... ليمتص قاذوراتنا الجنسيه من عقولنا ! ................................................................. ... وليد إدوارد 23/9/2012