المصباح المنير .. في فضح مساعدين المشير .. الجزء الأول ( اقرأ باهتمام ) .

بسم الله الرحمن الرحيم ..

الحقيقة الواحد مش عارف يبدأ منين .. عشان البلاوي كتير !!

والمتحولين كتير برده .. والمنافقين أكتر !

مكنتش حابب أتكلم عن أشخاص معينة .. بس الحقيقة في ناس ماينفعش غير اننا لازم نذكرهم بأسماؤهم ..

في ناس بتقود الثورة المضادة علينا ..

وبتساعد المجلس العسكري انه يكره الناس في الثورة والثوار واللي استشهدوا فيها ..

وكمان كيانات .. سواءا قصدوا .. أو مقصدوش .. سواءا عارفين .. أو مغيبين وبيتم استخدامهم ..

لكن الحقائق واضحة وضوح الشمس ..

واللي بيساعد على انتشار الناس دي وتغلغلها في المجتمع هما المصريين الغلابة .. اللي مش فاهمين ..

مع ان منطق الثورات على مر العصور بيقول ان الأقلية الواعية تقود الغالبية الغير واعية ..

بس احنا ف مصر هنا كل واحد فاكر نفسه واعي ..

وكل واحد بيفتي ..

ومحدش عنده استعداد انه يظهر للحظة واحدة غلط حتى لو قدام نفسه !

تخيلوا ده احنا البلد الوحيدة ف العالم اللي لو سمعت فيها حد بيقولك : " مع احترامي لحضرتك " .. تتأكد على طول انه هيشتمك بعدها !

عموما في المقال ده .. مش عاوز أركز على ناس تافهة .. زي أحمد سبايدر أو توفيق عكاشة أو ماسبيرو أو معظم الإعلاميين اللي هما كتير جدا ..

بس دي كلها ناس دورها واضح واحنا عارفينهم كويس جدا وناس كتير عارفاهم ..

انا هركز على شخصيات مستترة .. أو مش مستترة .. هي مختبئة خلف ستارة الدين بمعنى أصح ..

عندنا الكيان البرلماني المسمى بحزب الحرية والعدالة .. وعندنا واحد مربي دقن اسمه محمد حسان والناس بتقول عليه شيخ ..

طيب ..

الإخوان عملوا ايه عشان اهاجمهم وانا شخص ضد الديموقراطية وسافل ..مش دول اللي الشعب اختارهم .. على عيني وراسي الشعب والبرلمان والديموقراطية .. لكن ،

الفضايح ف البرلمان من الاخوان واضحة أوي .. نسيوا كل حاجة .. عشان خاطر الكراسي ..

ورفضوا استلام السلطة .. عشان خاطر يستكملوا الشورى طبعا .. رغم انه الشورى ده حاجة مالهاش أي تلاتين لازمة ..

بس ليه صمموا يستكملوا الشورى ..

طبعا .. في ناس صرفت كتيييير أوي عالحزب ف انتخابات مجلس الشعب .. وطبعا وعدوهم بالحصانة والكراسي عشان يراضوهم ..

ازاي بقى يستلموا السلطة ويضحوا بناس بتصرف مئات الآلاف على الجماعة ؟!

حاجة كمان .. الصفقة اللي بينهم وبين المجلس العسكري ..

اللي بقت واضحة وضوح الشمس ..

هتقولي ايه دليلك .. هقولك الموضوع مش محتاج تأزم نفسك ..

لما يبقى المتحدث الرسمي للجماعة " محمود غزلان " .. يبقى طالع معدوم الدم ويقول اهالي الشهداء لازم يقبلوا الدية وكمان ممكن نعمل خروج آمن للمجلس العسكري !!

ده يبقى اسمه ايه ؟

وكل شوية يصدرولنا واحد يقول تصريحات منيلة ويا إما يرجع فيها .. يا إما يقولوا ده رأي شخصي ولا يعبر عن الجماعة والحزب .. الله .. انتوا هتجننونا معاكوا ليه ؟

!

عايز دليل انه قال كده .. ماشي من عينيا .. ربنا يخليلنا جوجل ويخليه لأمه ..

خد الرابط ده :

http://www.egyday.com/%D8%A8%D8%A7%D9%84%D9%81%D9%8A%D8%AF%D9%8A%D9%88-%D8%BA%D8%B2%D9%84%D8%A7%D9%86-%D9%8A%D9%82%D8%AA%D8%B1%D8%AD-%D8%AA%D8%B9%D9%88%D9%8A%D8%B6-%D8%A7%D9%87%D8%A7%D9%84%D9%89-%D8%A7%D9%84%D8%B4%D9%87

وراح بعدها راجع ف كلامه زي العيال الصغيرة !! .. حتى شوف :

http://www.almogaz.com/politics/news/2012/01/4/140146

وطبعا شباب الثورة ماسكتوش .. وآدي جانب من ردهم عليه :

http://www.misrnews.com/view/814390.html

لا واللي أنقح من كده اللي عملوه شباب الإخوان .. شوية العيال الجدعان اللي طلعت بيهم الجماعة شوف ردوا على تصريحاته ازاي :

http://www.algareda.com/2012/%D8%B4%D8%A8%D8%A7%D8%A8-%D8%A7%D9%84%D8%A5%D8%AE%D9%88%D8%A7%D9%86-%D9%8A%D8%B7%D9%84%D9%82-%D8%A3%D9%84%D9%88-%D9%8A%D8%A7-%D9%85%D9%83%D8%AA%D8%A8-%D8%A7%D9%84%D8%A5%D8%B1%D8%B4%D8%A7%D8%AF/

واللي أكبر من كده انهم بعتوا للمرشد يقولوله مش عاوزينه خالص واتبرأ منه :

http://www.egyptindependent.com/node/592416

وفي مقال كان معمول ف المصري اليوم هايل بصراحة لازم تقرؤه :

http://www.almasryalyoum.com/node/594981

أحلى حاجة بقى الرد بتاع أسر شهداء السويس .. عملوا معاه حركة كويسة :

http://www.alrsd.net/vb/showthread.php?p=533

وف حفلة تأبين الشهيد الشيخ عماد عفت .. واللذيذ ف الموضوع ان ماحدش م الإخوان كلف نفسه وحضر الجنازة .. مع ان الكنيسة بعتت ناس حضرت الجنازة .. بس فالحين يحضروا حفلة تأبين بس .. يموتوا ف الزيطة والأحتفال .. ينفع يبقى والدك " لاقدر الله " متوفي وانزل أنا اعمل حفلة ؟!!

أي مخ ده !! .. وعموما ف تأبين الشيخ عماد الناس اعترضت ان الشيء ده يلقي كلمة :

http://www.arabnet5.com/news.asp?c=2&id=124527

بيقولك مرة واحد اخوانجي أبوه مات .. نزل يحتفل ان والدته لسة عايشة .. وعجبي !!

نيجي بقى للضربة القاضية .. اللي كانت من الشيخ وجدي غنيم .. الراجل العلامة الكبير أوي .. اللي ياما مسخر بمبارك ونظامه الأرض .. رد على غزلان رد شافي وافي .. بص كده :

http://www.boswtol.com/politics/news/12/january/6/48277

والرابط ده فيه الفيديو اللي الشيخ وجدي اعترض فيه :

http://www.almasryeen.com/?p=3771

ده كمان غزلان أفندي مارحمش الصحفيين واعترض على حرية الصحافة والتعبير وعاوز يفعل قانون حبس الصحفيين ويرجعنا لعصر القمع بتاع مبارك حتى شوف :

http://elbadil.net/%D8%BA%D8%B2%D9%84%D8%A7%D9%86-%D8%A7%D9%84%D8%A7%D8%AE%D9%88%D8%A7%D9%86-%D8%A3%D8%B9%D8%AF%D8%AA-%D8%AF%D8%B3%D8%AA%D9%88%D8%B1-%D8%A7%D8%B3%D8%AA%D8%B1%D8%B4%D8%A7%D8%AF%D9%8A-%D9%8A%D8%A8/

وطبعا الصحفيين ماسكتوش وعملوا احتجاجات وفردوا ليها مساحات واسعة ف الصحف والمواقع الإخبارية :

http://shobiklobek.blogspot.com/2012/01/blog-post_7927.html

وخد الرابط ده كمان :

http://arabiansword.wordpress.com/2012/01/12/%D8%A7%D9%84%D8%B5%D8%AD%D9%81%D9%8A%D9%88%D9%86-%D9%8A%D8%B4%D9%86%D9%88%D9%86-%D9%87%D8%AC%D9%88%D9%85%D8%A7-%D8%B9%D9%84%D9%89-%D8%A7%D9%84%D8%A5%D8%AE%D9%88%D8%A7%D9%86%D9%8A-%D9%85%D8%AD/

كل ده .. عمله المتحدث الرسمي بس !! .. فما بالك بباقي القيادات والنواب اللي مواقفهم غريبة جدا ..

يطلعلك واحد مع نفسه ويقدم بلاغ ف الإشتراكيين الثوريين ويقول انهم عاوزين يسقطوا الدولة ويهدوا البلد وفضيحة بانديتا أو فانديتا اللي معظمنا عارفينها ..وبعد كده يطلع واحد وراه يعتذر ويقول موقف شخصي .. على أساس ان في حد ف الجماعة بيعمل موقف شخصي وبدون اتفاق واحنا هنصدق ده !! ..

ده غير النائب اللي وقف وعيط وكل الناس سقفتله وخلاص وعيطت معاه .. وبعدها طلع يكدب أبو حامد ويتخانق معاه على الهوا .. ويبرأ ف الشرطة بشكل غريب جدا ف أحداث بورسعيد ويقول ان أبو حامد ساب لجنة تقصي الحقائق هو وعمرو حمزاوي ومشيوا .. مع ان ده مش صحيح وابو حامد رجع القاهرة عشان الضرب اللي كان عند وزارة الداخلية وشارع منصور ومحمد محمود .. اللي هي المفروض دايرته الانتخابية .. والراجل فضل واقف معانا ف الشارع يوم كامل بيلم ف الخراطيش المضروبة وقنابل الغاز !!

وبعد كده .. يطلع الكتاتني ف المجلس ويقولك مفيش خرطوش اتضرب والوزير أخبرني !! ..

وزير مين اللي أخبرك .. على فكرة يابرنس وزير الداخلية أخبرنا كلنا قبل كده ان انت والشباب " محظورة " .. واحنا ماصدقناش زيك !!

ولما يقوم أبو حامد ف وسط الجلسة ويكسفه ويطلعله الخراطيش .. تشتغل سياسة التخوين العظمى تجاه أي حد مش عاجبهم .. ويطلعلك نواب تلبس عباءة التدين ف ثانية ويقولوا إن جائكم فاسق بنبأ فتبينوا ..

سبحان الله .. مع ان في نفس الجلسة طلع واحد إمعة وكائن فلولي اسمه مصطفى بكري قبلها بعشر دقائق واتكلم وقال البرادعي عميل وخاين وأمريكي وكله راح ضاحك وسقفوله .. يموتوا ف الزيطة .. اشمعنى ده ماتقالوش إن جائكم فاسق بنبأ ؟! ..

وبمناسبة النائب الفلولي المثقف المحترم العارف بالله مصطفى بكري .. في حتة مقالة ف جريدة التحرير للكاتب وائل عبد الفتاح بعنوان " ملك البورنو " .. ف العمود المخصص ليه اللي اسمه " مفترق طرق " .. بتاريخ الأربعاء 22 فبراير 2012 ..

نرجع لموضوعنا والفضيحة وسياسة الكيل بمكيالين ضد نائب تاني معارض وهو زياد العليمي .. زياد العليمي اتحول لجنة تأديبية ف مجلس الشعب ومهدد بين لحظة والتانية انه يفصل من المجلس عشان قال على طنطاوي حمار .. طب ده زياد المفروض يعتذر للحمار لأنه مفيد ورفيع الشأن وكائن مكرم .. أما طنطاوي ده مالوش وصف الحقيقة .. المهم ان زياد العليمي اتحول للتأديب رغم ان كلامه كان خارج المجلس وقبة البرلمان .. واللائحة لو طبقتها صح بدون " تــــعــــريـــــض " هتلاقي ان لا وصاية ولا حصانة على كلام النائب خارج قبة البرلمان .. والأحق بالتحويل .. الكائن الفلولي المدعو مصطفى بكري لأنه شتم البرادعي وستة ابريل داخل البرلمان ..

على فكرة .. أنا مش مع البرادعي أصلا .. واللي هيدور ورايا هيلاقيني ماسك حملة الشيخ حازم صلاح في طب أسنان وصيدلة عين شمس .. ولا أنتمي لأي أحزاب ولا جماعات ولا حركات ..

والحركة الوحيدة اللي بنتمي ليها هي حركة " عسكر كاذبون " .. اللي كلنا طبعا عارفينها وعارفين دورها ..

وكمان من قلة الأدب الشديدة .. انه يتصرف خمسة مليون جنيه على تجهيز مستشفى سجن طرة وتطلع اللجنة المكلفة بالمعاينة من البرلمان تقول ان المستشفى غير جاهزة وغير مؤهلة لاستقبال المخلوع .. مانت يا اما بتحميه وعاوزه فايف ستارز ف المركز الطبي العالمي .. يا اما بتحميه برده وعايزه فايف ستارز !!

الانشغال السافر من حزب الحرية والعدالة بمصالحه على حساب الارادة الثورية خلى أسهمهم تنزل وتتراجع بشكل ملحوظ جدا .. وعشان كده بيحاربوا باستماتة على تكميل الدستور تحت حكم العسكر عشان يطيلوا فترة بقاؤهم لأربع سنوات مش الكام شهر دول بس ..

عموما أنا قلت حاجة بسيطة من اللي عندي ضد الإخوان .. وعشان ماتزهقوش .. المقالة الجاية وهتبقى الجزء التاني من السلسلة دي .. هتكون عن كائن فلولي آخر اسمه محمد حسان والناس بتقوله يا شيخ ..

ولحد مالمقال الجاي يطلع .. مش عاوز حد يشتم عشان بقولكم الحقيقة .. واللي جاي أصعب وأشد وطأة بكتير ..

ومش هنبطل فضح لكل الناس اللي خونتنا .. حتى لو كان ده سبب ف الشتيمة لينا أو خسارة لناس حبيناهم وكانوا اصحابنا يوم من الأيام ..

أخيرا .. أنا أقسم بالله مش غرضي أني أثير بلبلة ولا بخون الجماعة ككل ولا بحب سياسة التخوين دي أصلا .. بس الكيل بمكيالين .. واللي بيعملوه بعض النواب وقيادات الجماعة حاجة تكسف .. وتثير الشكوك غصب عننا ..وفي ناس كتير محترمة منتمية للفكر الإخواني واللي مثال منهم شباب الإخوان .. وصديقي وأنتيمي إخواني .. بس محترم .. وهتلاقوا عندي ف الأصدقاء انسان جميل أوي اسمه عمرو يوسف .. شاعر محترم أوي .. وبرده إخواني .. بس بوقره بشكل شديد وربنا وحده يعلم..عشان كده أي حد هيحاول يقول اني بخون الجماعة ككل وبهاجمها وبس .. لأ .. أنا بنتقد سياسات معينة بيمارسها ناس معينة بفكر قيادات غريب جدا .. يمكن بننتقد بشدة .. بس مش هخون الجماعة ككل ..

ألا هل بلغنا .. اللهم فاشهد ..

وأحب أهدي لقيادات لإخوان أغنية صغيرة من تأليفي .. مع الاعتذار لعمرو دياب اني أخدت أغنيته للمخلوع وعملتها ضد فكر معين في قيادات الإخوان :

اللي باعو دم أخويا لأجل كرسي البرلمان ..

واللي نسيوا ان لولا دمه كانوا ف اللومان ..

واللي هربوا مننا .. كسروا حلمه وحلمنا ..

واللي يوم ماقلنا اصحوا كفرونا بربنا ..

كانوا عايشين وسطنا .. كانوا ناسنا وأهلنا .. فجأة مبقوش مننا .. خونونا ف فكرنا !

والسلام عليكم ..

لو مقتنع .. شير الله يكرمك ^_^