فيديو:خطاب ابيض واسود لمبارك لو كان يوم 25 يناير لكنت اجهاضة الثوره

شاهدوا هذا الفيديو حتى تعلموا أننا ظلمنا حسنى مبارك

أنا بجد زعلت على حسنى مبارك بعد أن شاهدت هذه اللقطات للرئيس السابق "حسنى مبارك" بصراحة قال كلاما ثوريا أكثر من ثوار 25 يناير وقال كلاما بجد قنبلة بس احنا شعب "وحش" لما يكون الرئيس اللى بيحكمه ثورى ميعجبوش لازم كل الناس تشوف هذا الفيديو "علشان" يعتذروا لحسنى مبارك الراجل من زمان وكان ناوى يسمع كلام الرأى العام وينصت لقرار الشعب بس الشعب لم يعطه الفرصة الكاملة ايه يعنى يحكمنا 30 سنة ولا حتى 100 سنة طالما إن نية الراجل كان هيرضخ للرأى العام المصرى ولا يستطيع أن يتجاهله بجد احنا ظلمناك كتير يا عم حسنى،وأنا شايف إن مجلس الشعب المفروض يطلع بيان اعتذار للسيد الرئيس،ويطالب بعودته للرئاسة كمان 30 سنة عشان ربنا ميدخلناش النار بسببه وعشان نكفر جميعا عن سيئاتنا لازم نعمل للرئيس زيارة جامدة فى سجنه وكل واحد معاه فردة "شبشب" يضرب بيها نفسه أمام السيد الرئيس إعترافا بذنبه وإنه خرج ضده،وده يعنى إن الشعب مكنش فاهم سياسة جدو "حسنى" والراجل قال بعضمة لسانه إنه شايف الصورة سودة ومهببة وبرضه قال إن ربنا اعطانا عقل نفكر بيه وهو كان قاعد يفكر بس احنا شعب منستهلش واحد زى فخامة الرئيس حسنى مبارك أمد الله فى حبسه أستغفر الله أقصد أمد الله فى عمره يمكن الشعب يرجع فى كلامه ويروح يجيبه لأن الشعب مش عارف يعيش من غيره والمصيبة إن الناس بيظلموه ويقولوا هو اللى ورا مذبحة "بور سعيد"وهو يا حبة عينى نايم ومش قادر يتكلم فى السرير من يوم المحاكمة،وياريت سايبنه لا ده حتى مراته الست الكمّل اللى مفيش منها اتنين فى المديرية وقال النائب الدكتور مجدى قرقر عاوز يحطها فى سجن القناطر يعنى لازم نحبسها يا دكتور خليها برة أهى بتعمل زيارة للرئيس خليك حنين يا دكتور شوية على الست سوزان وبخاصة لما تشوف الفيديو المنشور فى هذه التدوينة وقد إيه حسنى مبارك كان بيحترم إرادة الشعب،وإنه مع الشعب إذا قرر الإطاحة بنظامه ياه لو انتظر الشعب على حسنى مبارك كمان 30 سنة كان هيسمع الكلام وهيمشى لوحده مكنش لازم الاستعجال يا جماعة.

كتب: ابو المعالى فائق