نصائح واحتياطات هامة في حالة القبض عليك..من الشرطة العسكرية

منقول

نصائح واحتياطات هامة في حالة القبض عليك..!

النصائح دي مهمة جدا تعرفها عشان هتفيدك في حالة - لا قدر الله - القبض عليك..

أولا : احتياطات هامة :

- جهز رسالة علي موبايلك تدل علي انك اتقبض عليك واتفق مع اي حد صاحبك لو بعتله الرسالة دي يبلغ مجموعة لا للمحاكمات العسكرية عشان نقدر نلحق الموضوع من اوله (صدقني الوقت هيفرق معاك جدا)

 - حاول متشيلش علي موبايلك او اي حاجة معاك صور لمظاهرات او اي حاجة "تبع الجيش بالذات" ولو بتصور انقل الصور في اسرع وقت وياريت لو تحط صورك عالبحر او في النادي (حسسهم انك عربيد وبتاع هلس ومالكش في السياسة صدقني هيبقي الموضوع اسهل)

- لو بتصور حاول تكون مختفي علي اد ماتقدر ومتخليش حد يحس بيك بالذات لو في قلق

- لو نازل مظاهرة او وقفة حاول تخفف شيلتك علي اد ماتقدر , يعني ماتاخدش معاك اي حاجة مش ضرورية .

- لو مش مقبوض عليك ودخلت اي منطقة عسكرية لأي سبب لازم تعرف اي حد بمكانك وتشهد حد انك داخل بإرادتك ومش مقبوض عليك..عشان ممكن يتلفقلك إقتحام منطقة عسكرية.

- متخليش منشنات تويتر تجيلك في رسايل علي الموبيل عشان ممكن تعملك مشكلة لو فتحو الموبيل

ثانيا : في حالة -لا قدر الله- القبض عليك :

لو اتقبض عليك عندك طريقتين عشان تطلع من النيابة ومتتحولش محاكمة : 

1)  يا اما تبقي ناشط مشهور وفي الحالة دي هتطلع لانهم مش عايزين وجع دماغ.

2) يا اما تعمل نفسك مش من هنا ومتعرفش اي حاجة عن اي حد :

- اثناء القبض عليك حاول تتخلص من اي حاجة مش ضرورية معاك او ممكن تعملك مشكلة..احدف اي حاجة معاك لأي حد صاحبك تشوفه...لو دخلت مش معاك اي حاجة غير بطاقتك فده هيريحك من اسئلة كتير اوي.

- احرص علي ان اي حد يعرفك يشوفك وانتا بيتقبض عليك عشان الناس تقدر توصلك و يعرفو انتا فين.

اثناء التحقيق :
- حاول تبقي هادي ومتزن وماسك اعصابك علي اد ماتقدر.

- خلي إجاباتك مطاطية وسطحية ومتديش معلومة واضحة او كاملة وقلل كلامك علي اد ماتقدر.

- لازم تعرف انهم حيرهبوك نفسيا جدا وكلام من نوعية "دنتا هتروح ورا الشمس" .. تأكد ان كل الكلام ده مجرد تهديدات وبيكون هدفها يضغطو عليك و يوتروك عشان تخاف 

- ممكن يحاولو يلفقولك قواضي وعشان كده بقولك دايما خلي في شهود حواليك 

- لو روحت النيابة العسكرية فمتقلقش هما مش بيضربو ولا بيشتمو بس هيعملولك ارهاب نفسي جامد اوعي تخاف منه...وفي حالة ان الموضوع كان ودي شوية وجابولك حاجة تشربها فأشربها عادي ومتخافش مش حاطينلك فيها حاجة تخليك تعترف كما يشاع.

- انكر معرفتك بأي حد ليه علاقة بأي حاجة! مثلا: "كنت واقف مع مين؟؟كنت واقف لوحدي" "كنت بتعمل ايه في الحتة الفلانية؟كنت واقف بتفرج"

-افتكر الجملة دي كويس اوي "هذه الاتهامات انكرها تماما"

- اعرف انهم هيضغطو عليك عشان تقول اي اسامي كانت معاك...مهما عملو متدخلش حد جديد معاك!! 

- مهما سمعت من كلام معسول من نوعية "انتا زي ابني وانا عايز مصلحتك" متتخدعش فيه ومتسلمش!

وضروري تخلي ارقام مجموعة لا للمحاكمات العسكرية للمدنيين معاك احتياطي

القاهرة 0107821006 - 0102850271

الاسكندرية 0194874569

وبكل اسف انا بكتب التدوينة دي بعد ما يسمي بـ"الثورة" بـ 8 شهور..وارجوكم خدو بالكم من نفسكم :