المواطن عيد سعيد
- تصوير : محمد اكسجين _كتب: شهرزاد الثورة
- اى حد بيبدأ فى حياته ويفتح عينه بيشوف والده ووالدته بيشوف حياة ويتأقلم عليها ايا كانت هذه الحياة مجتمعى مصرى او غيره سواء مجتمع آدمى او غير آدمى بيتقألم معاه لأنه لازم يقبل ما وضعه الله له وهى لحكمة من الله بس اليتيم بيفضل طول عمره يتيم والحقيقة وجد نفسه فى دار ايتام غير مخير ولا مسير هو مجبر ونفسه يكون حاجة فى حياته فلازم ياخد طريق للوصول للهدف مهما كانت الطريقة وانا كانت خطواتى الأولى فى دار للايتام اولا انا اسمى عيد سعيد على السيد 22سنة خريج معهد عالى درسات عليا معايا دبلوم سياحة وفنادق والقدر والمجتمع والمجموع يجبرك على تحديد مستقبلك وحياتك
- أكسجين : احكيلنا عن التربية والحياة داخل الدار والتعليم والرعاية كانت ازاى ؟؟؟
- انا اتوجدت فى مكان ووضعت فى دار ايتام وعلشان يبقى لى كيان اتسميت اسم مش حقيقى علشان يبقى لى ورق وشهادة ميلاد انا دخلت الدار وكان له فضل كبير عليا جدا انا بعتز بتربية الدار ليا كان فى تعليم وكان فى ضرب عادى ضرب يعلم مش يهين حماية ورعاية ومستوى تعليمى واجتماعى ورقى فى المعاملة احنا كنا 300 فرد محتاجين رعاية ومصروفات واكل وشرب وتعليم والحمد لله كانت الدار فى منطقة راقية فى المعادى فالمجتمع المحيط كان بيحاول يوفر الرعاية النفسية والإجتماعية وحسن المعاملة وكان بيجى مدرسين يذاكروا لنا ويساعدونا وطبعا التبرعات والدعم
- أكسجين : ما أول صدمة اللى اتصدمتها فى حياتك ؟؟
- فى الطفولة مفيش صدمات لكن الصدمة كانت لما حبيت وكنت اشتغلت وحوشن فلوس وقلت اطلب ايديها لكن اترفضت بس علشان انا من دار ايتام ومش معروف عيلتى رغم انى مش انا اللى اخترت اللى انا فيه ومش عيب فيا الإنسان مش بأهله بشخصه واخلاقه بس المجتمع مش عايز يفهم دة ...علشان كدة كنت بحاول اكون بشخصى حد يشرف ابنى نفسى يعنى اهلى لو موجودين هيعملوا ايه ليا ولا لزوجتى فى المستقبل مين دلوقتى بيساعد ابنه هل اهلى هيصرفوا عليا وعليها مثلا هو فى اهل بتنفع حد دلوقتى ولا ابناء بيساعدوا اهاليهم المهم انا بشخصيى باخلاقى وبقدرتى على تحمل المسئولية هو دة الفكر
- أكسجين : انت عارف ان عبد الحليم واحمد فؤاد نجم كانوا فى دار ايتام وبقوا عظماء ؟؟
- انا علشان كدة عايز اكون عيد سعيد
- أكسجين: ايه اكتر لحظات حسيت فيها بالحرمان فى الدار ؟؟
- فى حاجات مينفعش حد يحل مكانها زى مامتى مفيش حد مكانها وهى اللى كنت محتاجها
- أكسجين : مشوار التعليم وبناء الشخصية وشهاداتك واكتر حد أثر فيك ؟
- انا حصلت على التعليم الأساسى وبعدين دخلت ثانوى فى الأورمان والأورمان بتحط الطلبة الأيتام كلها فى مكان واحد علشان ببلاش ودول بيبقى معروف انهم ايتام وكدة بس دة غلط طبعا لأن المعاملة معانا بتبقى بشفقة واحنا مش آداة للشفقة احنا نتيجة مجتمع غلط واحنا مش اللى يتحمل الغلط دة احنا ظروفنا هى اللى عملت كدة ودة مش ذنبنا ...انا حصلت على ثانوية سياحة وفنادق رودبلوم السياحة والفنادق ثم المعهد العالى للسياحة وخلصت بكالريوس سياحة وفنادق وخلصت وبفكر ادرس تعليم مفتوح ادرس اعلام واحقق حلمى انى اكون مذيع .. انا الحمد لله اشتغلت فى مطاعم ودولقتى بشتغل فى فندق وظروفى الحمد لله اتحسنت كتير وانا باجتهد علشان تبقى احسن ...واكتر حد كان له فضل عليا وكنت باعتبرها زى مامتى هى مدام رباب فضلها مبير عليا جدا وطبعا كل الناس اللى فى الدار وفى ناس كتير ساعدتنى فى حياتى مقدرش انكر فضلهم طبعا
- أكسجين : ازاى ساعدت نفسك اثناء التعليم والمصاريف ؟؟
- كنت بشتغل فى الصيف من وانا عندى عشر سنين مكانيكى منجد اى شغل المهم محترم وحلال وخلاص وكنت بساعد فى مصاريفى لأن الدار مش هتتكفل بكل حاجة وكمان علشان اشغل وقتى وبعد كدة كنت بشتغل واجمع فلوس يعنى مخرجتش من الدار غير لما كان عندى شقة وفرشتها وخرجت من الدار عليها الحمد لله
- أكسجين : أصعب موقف مر عليك فى حياتك ؟
- لما خطبت كان اصعب موقف واكتر وقت كنت حاسس انى محتاج لأمى تكون معايا فى الوقت دة وهو موقف اخترت اعيشه واتكيف معاه
- أكسجين : عملت ايه فى اجراءات البطاقة ؟؟ والجيش ؟؟
- البطاقة كانت اجراءاتها صعبة شوية لكن جواز السفر طلع بسهولة اما مسألة الجيش دى بقى اللى كانت غريبة ...ليه انا ادخل الجيش وانا وحيد وخرجت من دار الأيتام عندى20 وفى ناس بتخرج عندها 18 سنة بعد ما لاتخرجت اشتغلت لمدة سنة واستقريت فى شغلى وبعدين عملت ورق الجيش ودخلت وانا مش عارف اصرف ازاى على نفسى فيه ومحتاج مصاريف لا انا عارف اشتغل ولا اعرف اصرف وكنت فى بداية طريق حياة جديدة بتتبنى يبقى ليه خريج دار الأيتام اللى لسة خارج بيواجه الحياة يدخل الجيش ولسة مأجر شقة معرفش ادفع ايجارها ولو نزلت اجازة هقعد فين ومرتب الجيش مش يأكل عيش ولا يكفى شئ يعنى لا شقة ولا مكان للسكن لو نزلت ولا شغل ولا فلوس فبدل ما ابدأ خطوات فى حياة ابدأ مشوار عذاب
- أكسجين : عملت ايه ؟؟
- انا فى ناس ساعدتنى انى اخرج من الجيش بسبب الظروف دى علشان مفيش مكان برة فساعدونى من باب التعاطف لكن مش دة اللى انا عايزه انا عايز القانون يتغير يا الدار تمد سن الرعاية شاملة فترة الجيش يا الجيش يعفى خريجى الدار علشان ملهمش مأوى ومحتاجين يبدأوا حياه ويثبتوا خطواتهم ويتحملوا مسئولية نفسهم
- أكسجين: ايه قصة جدالك مع الظابط اثناء التجنيد ؟
- وانا بعمل كشف التجنيد بقولهم انا ليا جيش ليه ؟؟ احنا ملناش ندخل كليات عسكرية ولا شرطة ولا غيره احنا محرومين من اى مكان يبقى لنا مكانة مرموقة فيه يبقى اشمعنى الجيش فقالى منقدرش ندخلك يمكن تبقى جاسوس .........وانا استغربت من رده ...انا انتمائى لبلدى محدش يشكك فيه وانا لو بقيت جاسوس يبقى ايه اللى وصلنى لكدة وما دام ممكن ابقى جاسوس فى نظرك ليه بتدخلنى الجيش
- أكسجين: ايه احلامك ؟؟ وايه اخبار حياتك العاطفية ؟؟
- احلامى انى اعيش كويس وانى انجب اطفال ...حياتى العاطفية انا خطبت قبل كدة من الدار بس محصلش نصيب لكن كل شئ قسمة ونصيب وان شاء الله اخطب واتجوز من دار الأيتام لأنى اقتنعت بكدة علشان لازم ألاقى حد يساعدنى وعلشان احنا مينفعش غير نننا نساعد بعض فى الدنيا والمجتمع دة
- أكسجين : ايه اكتر حاجة بتضايقك فى التعامل مع الحياة والمجتمع بعد الخروج من الدار ؟؟؟
- تصنيف المجتمع ليا اللى يخلينى دايما فى نظرهم محتاج تعاطف وشفقة وغيره لكن مش دة اللى احنا محتاجينه وخصوصا انه بيكون فى مرحلة معينة احنا محتاجين المجتمع يبص لنا بشكل احسنى من كدة احنا محتاجين نلاقى شغل يبقى من حقى اتعين فى الحكومة والحصول على شقة محتاجين قوانين تتغير ومنظمات المجتمع المدنى تتغير محتاجين نظرة احترام لحقوقنا كمواطنين مش نظرة عطف
99
 خريج دار الأيتام ممنوع من دخول الشرطة والكليات العسكرية){kind=link}
0 تعليقات
حريّة النقد والرد متاحة لجميع الزوار بشرط يكون خال من الكلمات البذيئة. تذكّر قول الله عز وجل (مَا يَلْفِظُ مِن قَوْلٍ إِلاَّ لَدَيْهِ رَقِيبٌ عَتِيد