مروح مره فى نص الليل
لقيت لجنه ببوكس وخيل
الضابط قاللى بطاقتك يا جميل
طلعت البطاقه من غير تطويل
وقولت أسمع الكلام
قاللى وأنت جاى منين
قولتله من فرح صاحبى حسام
قاللى صورتك ف البطاقه مش عجبانى
هنروح القسم سوا نتأكد تانى
وياريت تركب البوكس لوحدك
بدال ما اجيبلك المخبرين تساعدك
قلت بسرعه أنفذ الأمر
قبل من قفايا ما أنجر
ولما وصلنا القسم
أتاكدوا من صحه البطاقه
وكشفوا عن الأسم
لقونى تمام براءه
بس طبعا مرضيوش يروحونى
هى دى تيجى
ازم الأول فى القسم يفسحونى
وراحوا مسلمنى لعسكرى
بصراحه كان طيب مكنش مفترى
ولما سألته ليه هبات
قاللى تحرى مجرد إجراءات
قولت يا واد خليك شاطر
وعشان تخلص أى حاجه قولهم حاضر
دخلونى الحجز مع راجل عجوز
كان قاعد مكشر وضارب بوز
وتانى يوم فى الحجز زارنا المأمور
وسلم على العجوز عم منصور
ولما خرج المأمور
قلت للعجوز ده أنت طلعت مشهور
قاللى طبعا لازم
ما المأمور ده إللى مسكنى تحرى
لما كان ملازم.
رامى زين
( من ديوان دفتر أحوال بلدنا ) حالياً بالأسواق
0 تعليقات
حريّة النقد والرد متاحة لجميع الزوار بشرط يكون خال من الكلمات البذيئة. تذكّر قول الله عز وجل (مَا يَلْفِظُ مِن قَوْلٍ إِلاَّ لَدَيْهِ رَقِيبٌ عَتِيد