المصريين بعد 30/6 و الأكيل بمكيالين

أنا مع 30 يونيه و مع عزل مرسي و محاسبة الجناة قضائيا بالعدل .. بس أنا لما وافقت على النزول يوم 30 كنت عارف ان الفلول نازلين معايا و كنت عارف انهم مش نازلين عشان عيون الثورة و الحرية و العدالة الاجتماعية .. كنت عارف انهم نازلين عشان يشيلوا الاخوان من ع الكرسي و ينتقموا منهم عشان هما ياخدوا الكرسي .. ايوا كنت عارف كدا .. و ابقى كداب لو قلت لك مش عارف .. و قلت ساعتها هقف في وشهم و هأصر على اهداف الثورة و هأعزلهم هما و الاخوان سياسيا ﻷنهم أفسدوا الحياة السياسية .. مش بس الحياة السياسية .. دول أفسدوا كل حاجة ..

فجأة لقيتني عشان أعاند الاخوان و عشان مايشمتوش فيا بأرمي نفسي في حضن العسكر و الفلول .. و بقول لهم "فكروا لي شكرا" .. فجأة بقيت مش بعترض على أي حاجة .. دا بدل ما أعمل اللي كنت ناوي عليه .. بس قبل ما أبعدهم ، بلعوني .. معظم عيوب مرسي ظهرت في الفترة دي بالاضافة ان القمع زاد عن حده و البلطجية بقوا في حماية الشرطة .. و أنا بالع الجزمة و ساكت .. زمايلي مقبوض عليهم و متلفق لهم تهم .. و انا ساكت .. اشوف الحدث بعيني و الاعلام يكتب عنه كلام تاني خالص .. و انا مصدق الاعلام و ساكت ..

حاسس اني بقيت ازدواجي و اللي رفضته زمان بأقبله دلوقتي .. و بعد ما كنت بنزل من فترة أهتف و عندي استعداد أموت و أنا بهتف "يسقط حكم العسكر" .. و بعد ما كنت متشحطط من ميدان لميدان بأقدم عرض "عسكر كاذبون" .. فجأة كدا اقتنعت ان مافيش حاجة اسمها "عسكر" و ان اللفظ دا عيب و حرام .. و بعد ما كنت شايف الاخوان أندال ﻷنهم اتعاملوا بمنطق "ايه اللي وداها هناك؟" و بيبرروا سفك دماء شباب زي الورد و بيحرضوا على قتل و اعتقال كل اللي بيتظاهروا .. بقيت أندل منهم .. ﻷ و كمان بأحرض على اللي بينزل و اللي مابينزلش .. و بعد ما كان عندي استعداد أموت عشان أسقط الحكم العسكري .. فجأة كدا بقيت عايز حكم عسكري عشان الامن و الامان .. و فجأة كدا عجبني عمرو موسى بعد ما كنت مالي البلد جرافيتي بصورة عمرو موسى و جنبها كلمة "فلول" او سؤال استنكاري "هل أسقطنا المخلوع ليحكمنا رجاله؟" ..

هي الازدواجية دي مش عيب ؟ لأ يا أمور .. دي مش عيب بس .. دي حرام كمان .. انا كدا بأكيل بمكيالين و دا عند ربنا مش كويس خااالص .. فضلا عن المبادئ اللي صدعت الناس بها .. و ساعة ما جه وقت الجد .. اكتشفت اني كنت "بؤ" كبير و مصلحجي جامد اخر حاجة .. أنا اتختم على قفايا .. و بمزاجي