كلمات : سهام عبد الغفار.
انا مش بلطجي ياريس
انا واحد من اللي سعادتك كنت وعدتهم
واحد من الغلابة اللي جنابك اخذت صوتهم منهم
ناسيني ليه ياريس
انا واحد من اللي زمان كنت قاعد في الميدان جنبهم
فاكرهم ياريس ولا نسيت شكلهم
فاكر سيادتك لما كنت مظلوم زيهم
فاكر لما رقصت واحتفلت بنجاحك وسطهم
انا واحد من اللي سعادتك قال لهم
باب قصرك في اي وقت مفتوح لهم
والي يحتاجك يجيلك انت تحت امرهم
ياريس
انا واحد من الغالابة اللي صدقوك من غلبهم بيتعلقوا في اي قشة ويركبوا اي موجة تشيل فيهم وتحطهم
إتعشموا فيك يافندم وجولك حاسين انهم داخلين قصرهم
اللي جنابك قفلت بابه في خلقة أهلهم
سألوا عليك ياريس قالوا لهم
ده سافر يلف العالم
يشحت عليهم ويغرف لهم
استنوك ياريس واستنوا تجيب رزقهم
قعدوا الغلابة علي بابك يندبوا علي حظهم
لما رجعتلهم بخيبة امل علي وشهم
في لحظة طار البرج اللي باقى من عقلهم
وعلي قد فهمي وفهمهم
نطيت انا وورايا نطوا كلهم
فوق سورك العالي معلش ماهو من جهلهم
جيت فخامتك ياريس أمرت حراسك وسحلتهم
(كلمات : سهام عبد الغفار)
إرسال تعليق
حريّة النقد والرد متاحة لجميع الزوار بشرط يكون خال من الكلمات البذيئة. تذكّر قول الله عز وجل (مَا يَلْفِظُ مِن قَوْلٍ إِلاَّ لَدَيْهِ رَقِيبٌ عَتِيد