تحرش فى المترو

امبارح كنت راكبه المترو على الساعة عاشرة الصبح تقريبا فى 

عربية السيدات و المترو كان زحمة و كالعادة كان فيه بياع بينادى 

على البضاعة بتاعته و اللى حصل انه كان واقف فى نص العربية 

و كان عايز يروح لآخر العربية و بعض من السيدات عشان 

الزحمة كانوا رافضين مروره مابينهم و كانت خناقة كبيرة و 

هيصة و صوت عالى و بالرغم من رفض الستات دول و زعيقهم 

الراجل عدى ما بينهم بالعافية كنوع من العند فيهم و عشان 

الستات الرافضين كانوا يتعدوا على الصوابع فكانوا خايفين 

يشتبكوا معاه لأنهم مش قد الخناق مع بياع ممكن يكون معاه مطوة 

و عشان بقية الستات اللى فى العربية مش متضامنين معاهم و 

اكتفوا بالفرجة على الخناقة ... عادى هو ايه اللى هيهمهم ...

فإكتفت السيدات بأنهم يزعقوا و يتكلموا بصوت عالى عن قرفهم 

من الموضوع ده و البلطجة اللى بتم عليهم كله ده و الامر طبيعى 

و بيتكرر كتير و بشوفه اللى كان غريب بقى فى الموضوع ان 

كان فيه واحدة امريكية راكبة معانا و شافت الموضوع و كان 

معاها تلاتة من اطفالها .. بنات اللى حصل انى لاقيت جوزها 

الامريكى طبعا جه و ركب معانا بعد ما كان راكب فى العربية 

المشتركة و محدش من الستات كلمه فمنتهى الهدوء قولتله 

بالانجليزى ان دى عربية سيدات فلاقيته رد عليه بطريقة شبه 

عدوانية بالعربى ( احنا فاهمين ) !!!!!! الصراحة انا اندهشت 

مش لأن اسلوبه كان عدوانى .. لأ .. انا اندهشت لأنه بيقولى 

بمنتهى الجراءة انه فاهم ان دى عربية سيدات و انه ماينفعش انه 

يركب فيها و عادى معاه و مافيش مشكلة الصراحة هو نزل 

المحطة اللى بعديها و ركب العربية المشتركة بعد ما كان ناوى 

يفضل معانا فى الزحمة و اللى عمله ده تقريبا لأنه كان فاكر ان 

مافيش حد هيتكلم من الستات و لما لاقنى اتكلمت مشى و ركب 

العربية المشتركة بس اللى خلانى اشعر بالاهانة مش ان المواطن 

الامريكى ده كلمنى بقرف عشان هو لاقى انه كمواطن من دول 

العالم الاول بياخد تنبيه من مواطنة من دول العالم التالت و 

اعتبرها اهانة لا تغتفر فكان عدوانى معايا لأ .... انا شعرت بإهانة 

لأن الاخ ركب عربية السيدات لأنه عارف ان مصر ليست دولة 

قانون و انه اى شخص عايش فيها يقدر انه يخالف القوانين 

المحطوطة على الورق حتى لو مواطن من الدول اللى بتطبق 

القانون و النظام على اراضيها و مش هيحصله حاجة لأن 

المواطنين نفسهم مش بيهتموا بتطبيق القانون حتى لو بيعانوا من 

قلة تطبيقه شعرت بإستغراب كمان لما لاقيت الستات و منهم 

منقبات كانوا موجودين فى العربية الزحمة و بالرغم من كدة ما 

اتضيقوش لركوب راجل معاهم فى العربية فى عز الزحمة و 

مافيش واحدة غير لما انا كلمته قصادهم للاسف مصر ليست دولة 

قانون ..


... مصر دولة فوضى بتصرفات اهلها
 سلمى ابراهيم