شهادة كريمة أحمد سليمان، والدة الطفل فى احداث ابراج نايل سيتى

الطفل عبد الله أنور رمضان: ضربه الضابط بالكوز فكسر له أسنانه
شهادة كريمة أحمد سليمان، والدة الطفل المصاب عبد الله أنور رمضان (14 سنة)
كان عندنا حريقة خدت 3 بيوت فيهم عيل مات. الناس طلعت لطارق الحلواني مدير الفندق يطلبوا مساعدات لأنه متعود يعطي مساعدات. أهل الطفل اللي توفى في الحريق: محمد صلاح، عرفة صلاح، والدتهم وزوجة محمد صلاح، راحوا لطارق الحلواني الخميس قبل اللي فات، من 9 أيام.
عمرو ابني صاحبهم حاول يطلع فوق عشان يكون موجود مع اللي بيطلبوا فلوس. الأمن منعه إنه يطلع وشدوا مع بعض. جه ضابط سياحة تدخل وضرب عليه نار في رجله وبعدها طلقة في ضهره.. واتصلوا بجوزي رمضان (لأنه حارس أمن) عشان يشيل عمرو لأي مستشفى. طلع وشاله ونزل بيه ولقى عربية إسعاف في الشارع معدية، وقفها. قالوا له عمرو ميت وخده زي ما هو.. ورجعه مكانه. جوزي رمضان شال جثة عمرو وطلع الفندق يحطه مكانه. رمضان لقى الضابط ماسك عيل من رقبته. قال له انت كمان عايز تموّت الواد ده زي ما قتلت عمرو. الضابط قاله وأموّتك انت كمان. وضرب جوزي بطلقة في رجله. جوزي اتصل بإبني وقاله تعالى خدني أي مستشفى (وقام الضابط هرب). ابني وهو داخل بالعربية عشان يشيل جوزي ضربوا عليه نار (ضباط كتير تانية غير اللي هرب) وابني جاتله طلقة في رجله.
الناس شالت جوزي للمستشفى المركزي (التحرير العامة بإمبابة). رفضوا يستقبلوه وحالته خطيرة ونزيف شديد. رحنا بيه القصر العيني، وبعدها ابني شالوه للقصر العيني. جوزي طلع من المستشفى بعد ما شالوا له الطلقة وعنده مشكلة في الحركة بسبب الطلقة ضربت العصب.
وابني خرج من المستشفى بعد ما عمل شرائح في عظم رجله لأن الطلقة كسرت العظم.
اليوم اللي بعده، الجمعة، أخدوا ابني التاني (اختفى يومين)، بعد ما طلع، حكى لنا إنه كان فيه مشكلة بينه وبين ضابط اسمه "إبراهيم القوصي" والضابط كان مرقد له وأخده من الشارع. بقى الضابط يضرب في عبد الله ابني (14 سنة) هو واتنين أمناء في الحجز. النائب العام خرجه عشان سنه وعشان الضرب اللي انضربه. ورحنا للطب الشرعي في زينهم يوم الثلاثاء عشان نشتكي الضابط اللي ضربه وكسر له سنانه. ولسه ما أخدناش تقرير الطب الشرعي.
ورجعنا تاني للنيابة والنائب قال هأخرجه من الحبس وخلصوا الإجراءات، أنا قلت للنائب إن الظباط مش هيسيبوه يخرج. قال لو ضابط ضربه، رجعهولي تاني وأنا أبعته تاني للطب الشرعي وأعمله تقرير تاني.
رحنا القسم عشان يخرج، اتلم عليه مجموعة ضباط وكانوا عايزين يحبسوه تاني. لولا ظهر وكيل نيابة سابق (خالد عاش) واسطة لينا وأخده من وسطهم ولولاه مكنش عبد الله خرج من الحبس.
ومشكلة ابن أخويا، أحمد صابر، كان بيدوّر على عبد الله في اليومين اللي اختفى فيهم، راح ومرجعش، قمت أنا رحت للأمن المركزي اللي حوالين نايل سيتي وسألتهم عن أحمد صابر لأنه مريض عقلي. ضابط الأمن المركزي شتمني بألفاظ قذرة ومشاني. وكان معايا صحافة وضربوا علينا بالقنابل، وفيه صحفية انصابت.
خدوا ابن أخويا في مجموعة واتجدد 4 أيام و15 يوم.
يوم الأحد اللي فات رحنا نيابة العباسية عشان ابن أخويا وكنت بدوّر لسه على ابني، العساكر ضربتني بالعصيان والضابط طلّع الطبنجة وهددنا بيها. العيال خارجة من عربية الحجز مطحونين من الضرب. ابن أخويا مريض نفسي بعد الحريق اللي حصل عندنا.
هجموا علينا في البيوت الساعة 3 الفجر يوم الأربعاء، كلهم مغطيين وشهم ولابسين مدني ولابسين حكومة. كسروا البيوت وسرقوا فلوسنا وموبايلاتنا وشتمونا بأقذر حاجة، وخدوا 40 راجل لمدة 3 ساعات في قسم بولاق. ضربوهم كلهم.. طحنوهم ضرب. وسابوا معظمهم وخلّوا في الحبس الاحتياطي ناس قليلة 4 أيام في 15 يوم. ولحد امبارح بالليل بيخطفونا من الشوارع، بيلفوا بالتكاتك ويخطفوا الشباب، وكل ما يشوفوا جركن جاز يفضوه في الأرض.
هجموا على جوزي وابني وهما بالعكاز لولا إني هجمت عليه وقلت للضابط موّتني أنا دول مالهمش دعوة بحاجة، دول كانوا معديين بالصدفة والطلق جه في رجليهم.
عمرو الدالي كان ماسك الفندق زى طارق الحلواني وكان بيدي مرتبات للي بيحموا الفندق وشهريات للأرامل وكان عامل مائدة رحمن في رمضان. لما مسك طارق الحلواني قطع الشهريات وقطع مرتبات الأرامل وقطع مائدة الرحمن. كان بقاله شهرين بيقلل المرتبات لحد ما قطعها. في الحريق، رفض عمرو الدالي إنه يسيبلنا خراطين الحريق، فبدل ما بيت يتحرق، اتحرق 5 بيوت

من مركز النديم