انتهت الفقرة الكوميدية .. " فقرة الدفاع "مبارك

انتهت الفقرة الكوميدية .. " فقرة الدفاع "

بعد مدة كبيرة مش عارف أد إيه بالضبط , شهر تقريبا , انتهت فقرة من أهم فقرات محاكمة القرن و هى الفقرة الكوميدية " فقرة الأراجوز "و المعروفة إعلامياً ب اسم فقرة الدفاع , و هى التى يتم فيها الدفاع عن المخلوع و أولاده و وزير داخليته و ستة من مساعديه ..و رغم سرية الجلسات دى و عدم إذاعتها ع الهواء مباشرة

فقد علمنا من مصادرنا أن هذه الفقرة مليئة بالضحك الكتيــــــــــــــــــــــر من النوع اللى بيفطس ..

فمن ضمن الحاجات دى مثلا إن المخلوع طِلع ما تنحاش من الأساس عن السلطة , طب يمكن يكون تخلى ؟؟! لا برضوا طِلَع ما تخلاش , ف المخلوع لم يتنحى و لم يتخلى بل تحلى بالصبر الشديــــــــد!! و لمدة سنة كاملة , و صبر ع المجلس العسكرى اللى نقلهُم السلطة بالتليفون و لم يكلفهم بإدارة شئون البلاد , و صبر كمان على الشعب المصرى المجرم اللى قام بالثورة و اللى بسببها المخلوع كلم المجلس ف التليفون و ما كلفوش بإدارة البلاد و الله الموفق و المستعان زى ما سمعنا كلنا ف الخطاب

ف الله يكرمه المخلوع ( مخلوع ايه بقى )ف الله يكرمه السيد الرئيس الصبور : محمد حسنى مبارك صبر علينا سنة كاملة

و بعدين يا جماعة الراجل قال من الأول انه مش هيورث السلطة لأبنه جمال , و كمان لم يكن ينتوى الترشح لفترة رئاسية أخرى و هيموت ف البلد دى , و الراجل وفى بوعده , اه صحيح هو مامتش لسه . بس الحق يقال وفى بوعده ... ف إحنا أسفـيــــــــــــن يا صبوووووووووووووووووور

و من ضمن الفقرة برضوا إن المخلوع قال ايه!! لسه رئيس مصر و هو الحاكم الفعلى للبلاد , بس زى ما تقول كده واخد أجازة مفتوحة .., عادى يعنى يا جماعة ,..ده الواحد مننا ياما بياخد أجازات .., كل اسبوع هتلاقى يوم أو اكتر أجازة , فما بالك بقى باللى شغال 30 سنة متواصلة هنستخسر فيه أجازة ..

و كمان من ضمن الفقرة ان وزارة الداخلية بريئة من قتل المتظاهرين و من أى حاجة حصلت فى البلد بعد نزول الجيش عصر يوم 28 يناير , ف الداخلية بريـــــــئة من كل حاجة ,, هى اه شافت اللى بيحصل بس لا هى شاركت فيه و ولا هى منعته ... طب الداخلية كانت بتعمل ايه فى الفترة دى !!؟؟؟ا

اللى جاوب بقى ع السؤال ده محامى احد المسجونين العشرة و هو محامى " أسامة المراسى " اللى كان عايز يثبت برائة موكله فجاب سى دى موثقة من مديرية أمن الجيزة بتثبت وجوده هو شخصيا فى مظاهرة عند مسجد الاستقامة فى الجيزة و قال فى نفس المقطع اللى ع السى دى " أنا عارف إن في ناس افتروا من الشرطة أوي أوي " .. و ده غالبا فى نفس الفترة اللى غيروا كان بيقول ان الشرطة غير مسئولة عن أى حاجة بعد نزول الجيش للشوارع..

فأمرت النيابة بإثيات السى دى ضمن أدلة الاثبات التى تدين المتهمين :)))) فضحك الجميع بما فيهم المساجين العشرة المتهمين و قضاة الدفاع و النيابة و جميع من حضروا هذه الفقرة الممتعة , و انتشر الضحك فى المكان و ظل المخلوع يقهقه
و يقول" يا ولاد التيييت ..حتى مش عارفين تدافعوا عنى و انا ريس أمال لما اتنحى هتعملوا ايه" فزاد الضحك أكثر ,, فاضطر القاضى ان يقول جملته المشهورة ( قررت المحكمة تأجيل القضية لحين الانتهاء من باقى الفقرات ) و ما قدرش يمسك نفسه من الضحك بعدها

يوم الاتنين سماع تعقيب النيابة عن الفقرة الكوميدية

يا رب تبقى فقرة الاكشن و نخلص

أ-إ