أسئلة لكل من يقول نعم لمبارك:

ا لكل المتعاطفين مع حسنى بعد الخطاب اللي كلنا
بربرنا وعيطنا بعد ما سمعناه أرجو الرد على هذه الاسئلة :

...مين زور الانتخابات ؟
هل حسنى ميعرفش اللي بيحصل دلوقتي في ميدان التحرير من ضرب المتظاهرين ؟
لما بتنزل تجيب عيش مش بتقف في طابور ؟
شغال بشهادتك ؟
ليه حكم 30 سنة في حين ان فيه دول غيركو عليه 6 حكام ؟
ليه اي حد بيتكلم في السياسة بيتحبس او يتوقف عن العمل في الاعلام ؟
هل مش من حقي اتظاهر ضد النظام بطريقة سلميه ؟
هل من حقهم يقتلو المتظاهرين ؟
هل من حقهم يضربونا بالرصاص الحي ؟
لما بتمشي في الشارع عمرك ما قابلت أمين شرطة وقفك ورخم عليك ؟
لما بتروح تخلص ورق حكومي الدرج بيتفتحلك ولا لا ؟
مش بتشوف بعينك الدقيق بيتباع في الافران قدام مندوب وزارة التموين ؟
عمرك شفت أي حاجة ضد الحكومة في التليفزيون المصري ؟
ليه المتظاهرين ينزل عليهم بلطجية يضربوهم ؟
لو اتخانئت انت وواحد أجنبي او عربي ودخلتو قسم .... ايه بقي ؟
لما بتسافر بره مصر وتتذل هل حقك بيرجع ؟
هل جمال مكنش هيبقي ريس بعد ابوه ؟
مين خرج المساجين مرة واحدة وفي وقت واحد ؟
مين سحب الشرطة في الجمهورية كلها مرة واحدة وفي ثانية واحدة ؟
لو في يوم كنت اتخانئت مع امين شرطة لأي سبب .. كان عمل فيك ايه ؟
هل الشرطة مش عارفه تجار المخدرات واحد واحد وبالاسم ؟
طب سايبنهم ليه ؟
ليه بنصدر غاز لإسرائيل ؟
ليه قانون طوارئ ؟
ليه الحزب الوطني واخد لوحده 97 % من مقاعد مجلس الشعب ؟
ليه مرشح الحزب الوطني ممكن ياخد 100 صوت لوحده مثلا من بلد فيها 50 صوت ؟
ليه كل مسجد يوم الجمعه بتقف قدامه عربية أمن دولة ؟
ليه لما تبقي متدين ومربي دقنك وبتصلي تتاخد وتتسحل في امن الدولة ؟
وليه لما تبقي قاعد ماسك بت وبتدعك فيها في الجامعه محدش يكلمك ؟
ليه المتر في مدينتي ب جنيه ؟
وليه كليو الأوطة ب 8 جنيه ؟
ازاي فيه ناس بتاخد مرتب 160 جنيه في الشهر بيصرفوا منه 400 جنيه مواصلات بس ؟
لما بتحب تتدخل شرطة بتدفع كام ؟
طب لما بتحب تدخل حربية بتدفع كام ؟
طب لما تحب تشتغل في البترول تدفع كام ؟
ليه المذيعات المحجبات بيتشالو من التليفزيون المصري ؟
وليه برده ان كل المحطات العربية عندهم مذيعات حلوين محجبات ؟
فين دخل قناة السويس اللي الحكومة قالت بنفسها انه بيدخل للفرد 8 دولار يوميا ؟
ليه لاعيبة انبي وبتروجيت بيخدوا ملايين من فلوس بترول مصر ؟
ليه كريم حسن شحاته شغال في الاعلام وايه هي مقوماته ؟
ليه شعار الشرطة في خدمة الشعب يتغير ؟
ليه احمد عز ؟
ليه نظيف يقعد 6 سنين وهو كل يوم بيثبت فشل عن اليوم اللي قبله ؟
ليه هشام طلعت مصطفى ميتعدمش وهو مدان مليون في المية في قضيته ؟
ليه في مشكلة الجزاير احنا نعتذر وهم لا ؟

وفيه اسئلة تانية كتير والله بس ايدي وجعتني من الكتابه اتمني واحد بس من اللي بيقولو نعم لمبارك يرد علي اي اي سؤال من دول
--------------------------------------------
محمد سامى حلمى